Slik blir DNT si nye turisthytte på Fannaråki

– Det er ikkje eigna for veldig mange overnattingsdøgn, men vi treng noko som fungerer, seier Jan Erik Reiten, driftssjef i DNT Oslo og Omegn.

12–16 millionar kroner

Forprosjektet for eit 400 kvadratmeter stort nybygg på Fannaråki vart onsdag presentert for styret i DNT. Der var signala «køyr på».

Slik planane ligg føre kan prislappen bli mellom 12 og 16 millionar kroner.

– Slike prosjekt har ein tendens til å utvikle seg. Heile anlegget bør eigentleg oppgraderast, men utgangspunktet er at vi over fleire år har erfart at det både er for lite plass for gjester og for dårlege forhold for dei som driver hytta, seier Reiten.

2.200 overnatta i år

Fannaråkhytta er mellom dei mest populære turisthyttene. Siste ti åra har i snitt 1.676 personar overnatta på den høgastliggande DNT-hytta i Noreg. I tillegg tek i snitt 3.500 personar i året dagsturen til fjelltoppen i Jotunheimen.

I år overnatta vel 2.200 gjester i hytta. Det er uvisst kor mange overnattingsplassar det blir med eit nybygg.

Reiten seier det i dag er trongt og vanskeleg å ta seg fram til sengene. Trongt er det også på kjøkenet, som i tillegg er lite funksjonelt. All lagring er spreidd på alle husa.

– Vi tenkjer soverom i det som er hovudhytta i dag, med rom for tilsette i toppen. Den nye hytta skal ha kjøkken, matsal, opphaldsrom og tekniske fasilitetar som lager, seier Reiten.

«Fannaråki stasjon»

Det er arkitektfirmaet Snøhetta som står for forprosjektet. Dei har også teikna nye Tungestølen og Fuglemyrhytta i Oslo. Sistnemnde opna i haust.

• Les også: Rasar mot DNT etter at Snøhetta vann konkurransen
• Les også: Tok første byggesteg for ny turisthytte

Seniorarkitekt Anna Cecilie Haug seier dei vil føre vidare historia til Fannaråki, som opphavleg var ein vêrstasjon.

Inspirasjonen har dei henta frå forskingsstasjonar i vêrharde strok. Nybygget, som Haug vil kalle ein «stasjon», må tole eit tøft klima.

– Utsida ynskte vi å gi eit stasjonspreg, eit litt tøffare preg. Inne er det lunt, godt, koseleg og trygt, og har fleire ulike romlege opplevingar som står i kontrast til den store og vide opplevinga utanfor, seier Haug.

– Er de budde på mange reaksjonar, som ved prosjektet på Tungestølen?

– Ja, men vi tykkjer det er kjekt at folk engasjerer og bryr seg. Samstundes ser vi ofte at dei kritiske røystene stilnar når arkitekturen blir bygd.

Søknad neste år

Reiten i DNT seier at dei har så langt berre fått positive signal på forprosjektet.

Det er uvisst når nybygget står klart.

– Først må vi gå gjennom det byggtekniske og lage meir detaljerte planar som grunnlag for ein søknad til nasjonalparkstyret. Det kan bli klart i løpet av året som kjem, seier han.