Skulle gjerne hatt fleire norske varer til turistane

SKEI (NRK): Kritikarar saknar lokalmat og lokalt handverk i butikkane som sel og serverer turistane. – Det skulle eg gjerne gjort, om eg berre hatt fått tak i dei, seier suvenir-seljar.

Hallvard Viken

LOKALT OG UTANLANDSK: Hallvard Viken vil gjerne selje fleire norske suvenirar i butikken sin.

Foto: Steinar Lote / NRK

Hallvard Viken er ein av dei som sel mest suvenirar i landet. Ingenting gjer han meir glad enn å finne hylleplass til norskproduserte varer i butikken sin.

Men norske varer er dyrare, og tøffare priskonkurranse har tvinga han til å fylle opp med billegare varer frå utlandet.

– Det er ei lei utvikling, men som enkeltbedrift kan vi ikkje gjere noko med det. Vi klarer ikkje styre det. Vi prøver å halde så mykje norske varer i butikken som mogleg, men det er krevjande, seier han.

Plast frå Kina

Reiselivsjournalist Odd Roar Lange tok eit kraftig oppgjer med norsk reiselivsnæring på reiselivsnettsida «The Travel Inspector».

«Lefse innpakka i plast, maskinprodusert kaffi i plastkoppar, suvenirar frå Kina kamuflert som om dei kjem frå Snåsa, Toten eller Stavanger og fabrikkprodusert mat på menyen. Noreg fløymer over av dette. Kvifor finn vi oss i det?», skreiv Lange i blogginnlegget.

No vert det etterlyst ein meir berekraftig suvenirproduksjon av kortreiste og ekte produkt. Men Hallvard Viken gjer det han kan for å fylle hyllene med norske varer.

– Eg skulle gjerne fylt butikken med lokale varer, dersom eg hadde fått tak i dei, seier han.

Suvenirer

SUVENIRAR: Turistar som kjøper suvenirar endar ofte opp med eit plastprodukt laga i eit land langt borte. Det meiner kritikarane er for dårleg.

Foto: Steinar Lote / NRK

Manglar norske produsentar

Frå Viken sin ståstad manglar nemleg dei norske produsentane.

– Vi er absolutt oppteken av å ha mest mogleg norske varer i butikken. Viss ein norsk produsent kjem med tilsvarande kvalitet til ein pris vi føler er akseptabel, så er dei velkomne, seier han og tar fram ein isbjørn-bamse.

Hallvard Viken

FRÅ JOSTEDALEN: Hallvard Viken med eit lokalt produkt – handspikka nøtteknekkar frå Jostedalen.

Foto: Steinar Lote / NRK

Men på andre hyller i gåve- og suvenirbutikken Audhild Vikens Vevstove i Jølster, står ein handspikka nøtteknekkar frå Jostedalen, keramikk frå Jølster og måleri frå Voss.

– Det å ha slike produkt i butikken synest eg er veldig kjekt. Og å fortelje historia bak, som denne 90-åringen i Jostedalen som lagar nøtteknekkarane, seier Viken.