I Sverige har skulder-skadde lenge kome mykje tidlegare attende i arbeid enn her i landet.
I neste månad startar sjukehuset med ortopedikirurg Ulf Svennerby i spissen kursing av primærlegar, fysioterapeutar, kiropraktorar og sjukehuspersonell for å gje skulderskadde raskare behandling.
- Må takast på alvor
Svennerby seier at det no er på høg tid at lækjing av skulderskadar vert tatt skikkeleg på alvor i Noreg og.
- Dette er blitt eit veldig stort problem. Det er fleire som no har skulderlidingar enn rygglidingar, seier Svennerby.
Kunnskapen om denne typen lidingar er svært variabel blant dei tilsette i helsevesenet. Og ofte opplever pasientar å verte sende på ein lang rundtur mellom legar, sjukehus, fysioterapeutar og andre fagfolk med plagane før dei får hjelp. Resultatet er sjukemelding og lang tid før pasientane kjem i arbeid att.