– Eg reagerer med vantru på regjeringa si vegsatsing. Det blir mykje prat og lite vegbygging, seier Tenden.
Tenden er spesielt kritisk til at det tek så lang tid å planlegge vegprosjekta.
– Berre på trekninga Skei-Hornindal på E39 er det sett av fire år til planlegging. Vi kan ikkje bruke mange år for å finne traséen gjennom ei lita bygd. Det heile tek altfor lang tid, seier han.
Tenden har leia Lastebileigarforbundet i Sogn og Fjordane i om lag ti år, og han har ofte vore skuffa over mangelfulle vegløyvingar. Då Høgre/Frp-regjeringa lova tidenes satsing på vegutbygging, fekk han store forhåpningar.
Men for Sogn og Fjordane sin del har Tenden vorte skuffa.
– Vi ser det blir gjennomført ei rekkje store prosjekt på Austlandet. Det blir ein kamp mellom by og land der distrikta blir nedprioriterte, seier Tenden.
- Les også:
Avviser kritikken
Samferdselsminister Ketil Solvik-Olsen (Frp) avviser kritikken.
– Tenden må hugse på at veldig mykje av satsinga skjer gjennom vedlikehald av det vegnettet vi allereie har. I tillegg byggjer vi mykje nytt, seier ministeren.
Han viser til at det over nyttår blir det sett i gang arbeidet på strekninga Bjørset-Skei på E39 gjennom Jølster. Han viser også til at det skal brukast mykje pengar på å utbetre riksveg 5 gjennom Sogndal og riksveg 13 frå Vik til Vangsnes.
– Vi får ikkje gjort alt på ein gong, men vi ser ei vesentleg høgare takt i vegsatsinga no enn det ein har vore vane med.
– Men kvifor må de bruke fire år på å planlegge vegen på E39 mellom Skei og Hornindal?
– Det tek tid å planleggje når ein skal byggje heilt nytt og der det er komplisert med nye tunnelar og store bruer, seier han.
– Tenden seier regjeringa prioriterer vegbygging i sentrale strok og at distrikta blir nedprioritert. Kva seier du til det?
– Nei, det er absolutt ikkje rett.
– Har den blå regjeringa ført veljarane i Sogn og Fjordane bak lyset i vegsektoren?
– Nei, det er heilt feil. Spesielt når det gjeld vedlikehald av det eksisterande vegnettet, satsar vi mykje meir enn tidlegare regjeringar, seier Solvik-Olsen.
- Les også:
Vil ikkje svare
Ministeren vil ikkje seie noko om kva tid E39 mellom Byrkjelo og Kjøs Bru i Hornindal vil stå ferdig. Stortinget har vedteke at E39 skal leggjast i tunnel under Utvikfjellet og bru over Nordfjorden.
– Prosjektet blir no planlagt, og dei store prioriteringane vil bli gjort når Stortinget vedtek Nasjonal Transportplan til neste sommar.
– Så du vil ikkje antyde kva tid du vil ha dette prosjektet ferdig?
– Nei, men vi jobbar for framleis auka satsing på vegbygging.