– Ofte går sjukepleiar åleine på vakt. Det hadde vore greit viss det var fleire på jobb samstundes, seier Marit Horstad, sjukepleiar ved Helsetunet i Førde.
Ho trur dette ofte er realiteten for sjukepleiarar på sjukeheimane, og det kan vere ein av grunnane til at nyutdanna sjukepleiarar ikkje søkjer seg til sjukeheimar.
Få av dei som er nytudanna sjukepleiarar i dag ynskjer nemleg å jobbe på sjukeheim.
Det viser tal frå ei undersøking gjort av Norsk sjukepleiarforbund (NSF) som NRK la fram tidlegare i år. Berre sju prosent av dei nyutdanna sjukepleiarane som svara på undersøkinga har sjukeheim som fyrsteval når dei søkjer jobb.
- LES SAKA HER: Nyutdannet: – Tør ikke jobbe på sykehjem
Auke i folketal, men berre blant eldre
Samstundes blir det stadig fleire eldre i Noreg. I 2030 vil det vere 8400 fleire innbyggjarar i Sogn og Fjordane, og heile folketalsveksten kjem i den eldste aldersgruppa, altså dei over 60 år. Det viser tal frå ein folketalsprognose for dei neste 15 åra som Sogn og Fjordane fylkeskommune presenterte i førre veke.
Med fleire eldre vil det bli auka press på hjelpetilboda til kommunane. Allereie no synest 60 % av kommunane i landet det er utfordrande å få tak i nok sjukepleiarar.
- LES OGSÅ: Eldre må ta ansvar for eiga helse
Spring med vaskefat
– Dersom studentane skal kome tilbake til sjukeheimane når dei er ferdigutdanna, må dei få eit riktig bilete av korleis det er å jobbe der, seier Joanna Galek, lektor og førelesar på sjukepleiarutdanning på Høgskulen i Sogn og Fjordane.
Sjukepleiarstudentane får for dårleg oppfølging i sjukeheimspraksisen, meiner ho. Sjukepleiarane som skal rettleiere studentane i praksisperioden har for lite tid, og derfor blir studentane ofte brukte som ekstra arbeidskraft.
– Dei kan ikkje berre springe med vaskefat rundt på avdelingane, seier Galek.
Studentane blir òg skremde av kor mange oppgåver den einskilde sjukeplearen har på sjukeheimane, trur ho.
– Vi får ikkje prøve korleis det er å vere sjukepleiar
Dette stemmer overeins med opplevingane til sjukepleiarstudentane Veronica Abbedissen og Emilie Næss frå deira praksisperiodar på sjukeheim.
– Vi får ikkje oppleve korleis kvardagen til ein sjukepleiar er på sjukeheimen. Vi får ikkje gje medisinar og vi får ikkje vere med på nokre spesielle prosedyrar som vi sjølve får gjennomføre, men det får vi i praksis på sjukehus.
- LES OGSÅ: Slår tilbake mot sykehjemsmytene
Kommunane må gjere meir
På sjukepleiarutdanninga på Høgskulen i Sogn og Fjordane rettleier dei både studentar og sjukeheimstilsette i praksisperioden, men Galek meiner at kommunane òg har eit ansvar for at studentane får den faglege oppfølginga dei treng.
– Kommunane bør opprette stillingar som jobbar med fagleg utvikling og kontakt med sjukepleiarstudentane når dei er i sjukeheimspraksis, seier Galek.
Ynskjer å jobbe fullt
Sjukepleiar Marit Horstad på Helsetunet i Førde trur at både fleire sjukepleiarstillingar totalt og fleire heiltidsstillingar kan lokke nyutdanna sjukepleiarar til sjukeheimane.
Det er sjukepleiarstudentane Abbedissen og Næss einige i.
- Eg har iallfall lyst til å jobbe så mykje som mogeleg, og eg vil gjerne ha ei hundreprosentstilling når eg er ferdig. Viss eg får det i kommunen i staden for på sykehuset, kan eg gjerne ta den.
Lovar betre oppfølging og fleire stillingar
– Desse signala må kommunane ta på alvor. Når dei har sjukepleiarstudentar i praksis, må dei leggje godt tilrette for dei, seier Jenny Følling, leiar i KS i Sogn og Fjordane.
– Kommunane må i større grad tilby heiltidsstillingar til sjukepleiarar som ynskjer det, meiner ho.
– Det er heilt avgjerande for unge og nyutdanna som er i etableringsfasen og skal skaffa seg hus og heim.