Med 14 mot 9 røyster gjekk kommunestyret i Fjaler i går inn for å avlyse anbodskonkurransen om tilrettelegging av nye lokale for Dale Sko. Årsaka er at lågaste tilbodet totalt kjem i overkant av 5 millionar kroner. Kommunen gjev ei styringsgruppe i oppdrag å jobbe for å finne ei rimelegare løysing.
Hovudbry
Flyttinga av den tradisjonsrike bedrifta Dale Sko har skapt hovudbry for Fjaler kommune. I mars vedtok kommunen å betale alle flyttekostandene for skoverksemda for å gje plass til paret Ralston & Bau. Designerfirmaet ville inn i industribygget som Dale Sko har leigd av kommunen og kommunen såg sjansen til å få framtidsretta arbeidsplassar til bygda.
Sterke kjensler
Men mange har reagert på at dette er å skubbe den gamle skofabrikken ut av reiret og det har vekt sterke kjensler. Og endå meir irritasjon har det skapt at kommunen rekna med 2,5 millionar kroner i flyttekostnader. Og no viser det seg at sluttrekninga kan bli dobbelt så stor.
Både kontrollutvalet og revisjonen har undersøkt saka og gjeve kommunen kritikk.