Hopp til innhold

Skodespelaren frå Lærdal spelar motstandsmann frå Solund i ny storfilm

Når den norske storfilmen «Den 12. mann» har premiere i jula er det med lærdølen Alexander Zwart i ei av rollene. Han skal tolke rolla som motstandsmannen Sjur Olai Trovåg frå Solund.

Kurt Olai Trovåg og Alexander Zwart

SPELAR MOTSTANDSMANN: Alexander Zwart frå Lærdal skal spele rolla som motstandsmannen Sjur Olai Trovåg frå Solund i «Den 12. mann».

Foto: Nordisk Film Production og Zwart Arbeid / Arkiv

Stjerneregissør Harald Zwart er snart klar med «Den 12. mann», eit krigsdrama som fortel historia om den dramatiske flukta til den norske motstandsmannen Jan Baalsrud.

Broren Alexander Einemo Zwart fyller ei av rollene som motstandsmannen Sjur Olai Trovåg frå Solund, som vart torturert og drepen av Gestapo.

Harald Zwart budde fleire år av ungdomstida si i Lærdal. Det er regissøren sjølv som har ytra ønske om ein førpremiere i sognebygda, slik han også hadde med filmen «One night at McCool's» for nokre år sidan.

– Harald har familien sin i Lærdal. Han har lagt vekt på å invitere alle klassevenene frå ungdomsskulen til denne førpremiera, seier kulturleiar i Lærdal, Magne Grøttebø.

Harald Zwart og Alexander Einemo Zwart

STORFILM: Filmregissør Harald Zwart (t.v.) og broren Alexander Einemo Zwart er frå Lærdal. Her er dei fotografert under innspelinga. Alexander spelar motstandsmannen Sjur Olai Trovåg frå Solund.

Foto: NORDISK FILM PRODUCTION OG ZWART ARBEID

Andre verdskrigdrama

«Den 12. mann» er eit stordrama frå andre verdskrigen som går føre seg i Troms i 1943. Tolv motstandsmenn på ei fiskeskøyte blir overraska av tyske soldatar. Elleve mann blir torturert og drepen, berre den tolvte slepp unna.

Skoten i foten, gjennomvåt og med hundre meters forsprang flyktar Jan Baalsrud ut i den nådelause, nordnorske vinteren med Gestapo i hælane.

Heilt uvitande om at vilja han viser til å overleve, vil gjere han til eit symbol for den norske motstandsrørsla, står det å lese i marknadsføringsmaterialet til filmen.

Jan Baalsrud si to månadar lange flukt til Sverige blir framleis rekna som ei av dei mest utrulege historiene frå andre verdskrigen, og vart første gong dramatisert på film i 1957, i «Ni liv» av Arne Skouen.

Innspilling Den 12. mann. Jonathan Rhys-Meyers og Harald Zwart

Filmregissør Harald Zwart saman med filmen sin antagonist, SS-Sturmbannführer Kurt Stage, spelt av den amerikanske skodespelaren Jonathan Rhys-Meyers.

Foto: Rune Nordgård Andreassen / NRK

Besøker ofte

Førpremiera vil skje i Lærdal kino, som ligg i Lærdal kulturhus, torsdag kveld 21. desember.

Baalsrud

NY STJERNE: Thomas Gullestad har hovudrolla som Jan Baalsrud.

Foto: Regi: Harald Zwart

Kulturleiar Magne Grøttebø ser fram til førpremiera og avslører at han er fan av Hollywood-regissøren.

– Ja, eg tykkjer at det som Harald regisserer, osar av kvalitet, seier Grøttebø.

– Kva forhold har Zwart til Lærdal i dag?

– Han er her om somrane, og vitjar familien sin ofte.

«Den 12. mann» er ein av dei dyraste norske filmproduksjonane nokon gong.

Under kan du sjå ein av trailerane: