NRK Meny
Normal

Skiskyttarstjerna kom ikkje lenger enn til benken

Han stod klar på sidelinja, men eit seint utlikningsmål til bortelaget øydela for fotballdebuten til Johannes Thingnes Bø.

Benkeslitaren Johannes Thingnes Bø

BENKESLITAR: Hit men ikkje lenger. Johannes Thingnes Bø var unytta reserve då Stryn i dag spelte uavgjort 2–2 mot Volda.

Foto: Alf Vidar Sneland / NRK

Tredjedivisjonsoppgjeret mellom Stryn og Volda enda 2–2. Før kampen var det knytt stor spaning til om nysigneringa Johannes Thingnes Bø, best kjent frå skiskyttarsporet, skulle få sjansen til å debutere med knottar under beina.

Slik gjekk det ikkje.

– Då kan det norske publikummet framleis tru at eg er god, i staden for at dei hadde sett sanninga, seier Johannes Thingnes Bø til NRK etter kampen.

Var svært nær eit innhopp

Alt låg til rette då heimelaget Stryn gjekk opp til 2–0. Men først bomma dei på straffe, så byrja det å rakne. For kvar redusering vart innhoppet ein stadig fjernare draum.

– Eg fekk tatt på meg leggskinna før Volda reduserte. Då rauk sjansen min, seier Thingnes Bø.

Sjølv om det ikkje vart noko av debuten, vil han ikkje love nye forsøk på grasmatta.

– Vi får sjå kva som skjer. Men det kan fort vere at dette var min sjanse.

(Artikkelen held fram under biletet)

Sat klar til å komme innpå

NAUT SOLA: Skiskyttaresset var klar til å gjere ein innsats, men innhoppet rauk i siste liten.

Foto: Alf Vidar Snæland / NRK

Vurderte å satse på fotball

I sine yngre dagar var Johannes Thingnes Bø eit heilt kurant fotballtalent. Lenge lurte han på om det var fotball eller skiskyting han skulle satse på.

Den tida er for lengst forbi, innrømmer Thingnes Bø.

– Etter alle åra med børsa på ryggen har eg mista ballkontakten heilt. Eg kunne kanskje sprunge rundt og øydelagt for motstandaren. Men eg trur definitivt eg hadde vore best utan ball, seier han.

Førebuingane til neste vinter er allereie i gong. No handlar det om å få flest mogleg treningstimar i forkant av ein viktig sesong, med VM i Holmenkollen som eit klart høgdepunkt.

At fotballen er ein sport med mange skader, var ein risiko skiskyttaresset var villig til å ta.

– Det er eg klar over når eg stiller til start her. Sånn sett kan det hende det var utlikninga som berga VM-gullet, seier Thingnes Bø.

Den nye regjeringa vurderer å kvitte seg med odelslova. Det kjem ikkje på tale, svarer bøndene.
Statens helsetilsyn har avdekka at fire av fem norske kommunar som blei sjekka bryt lova og gir eit for dårleg tilbod til utviklingshemma.
Første i Norge som har vektløfting som valgfag.