For eitt år sidan la kommunane til grunn ein skattevekst på seks prosent i 2014. Resultatet har berre blitt fjerdeparten.
Her i fylket ligg kommunane an til å få ein svikt i skatteinntektene på nær 100 millionar kroner i år.
– Det er nok ein kombinasjon av svakare vekst i nasjonaløkonomien og nedgang i folketalet, seier seniorrådgjevar Kåre Treen hos Fylkesmannen.
- LES OGSÅ:
- LES OGSÅ:
Kraftkommunane greier seg best
Skattesvikten er stor over heile landet – kring 2,8 milliardar lågare enn forventningane.
– Det starta allereie på slutten av fjoråret, då ein såg at veksten i skatteinntektene vart lågare, seier Treen.
Men det er enkelte kommunar som kjem betre ut enn andre. Her i fylket er det snakk om kraftkommunar som Aurland, Luster, Bremanger og Vik.
– Det kan ha si forklaring i at naturressursskatten, altså kraftskatten, også inngår i desse skatteinntektene, seier Treen.
Statsministeren seier nei til kompensasjon
Svikten i skatteinntektene var også eitt av tema i Stortinget onsdag. Der vart statsminister Erna Solberg spurd om kommunane som no må kutte i til dømes eldreomsorga, kan håpe på statleg kompensasjon for inntektstapet.
Statsministeren sa kontant nei.
– Vi har lagt fram vår saldering til handsaming i Stortinget og vi har ikkje føreslege å kompensere svikten i år, sa Solberg.
Dermed vil kommunane dra skattesvikten med seg over til neste år. Det kan ramme viktige tenestetilbod, seier Treen.
– Det gjeld gjerne dei største tenesteområda som omsorg, skule og barnehage. Så det blir nok ein krevjande situasjon for kommunane også i 2015, seier han.