– Vi fokuserer på kultur for å skape attraktive lokalsamfunn, seier Jacob Andre Sandal, som er fylkestingskandidat for SV.
Kultur er ofte det som først blir salderingspost når kommuneøkonomien skrantar.
– Det er også grunnen til at vi no løftar det opp til ei sak i valkampen. Vi har blant anna stått på for å unngå for store kutt på kultur, når fylkeskommunen no har gått gjennom tøffe nedskjeringsrundar.
Deponimotstand
Motstand mot planane om gruvedeponi er ei anna sak som blir viktig for partiet i valkampen.
– Det blir ei viktig sak på fylkesplan, og spesielt i kommunane rundt fjorden. I Naustdal har vi eit godt håp om at vår kandidat, Åsmund Berthelsen, skal kunne klare å ta ordførarvervet, seier Sandal.
Lister i 19 kommunar
SV stiller lister i 19 kommunar til valet, og målet er representasjon i like mange kommunestyrer.
– Vi har som mål å bli representert i alle kommunane vi stiller liste. Ved førre val så mangla vi til dømes fire røyster på å bli representert i Høyanger. Det syner berre kor viktig det blir å stå på no i valkampen, seier Sandal.