– Vi vil vere betre rusta når neste storm treff oss, men då treng vi meir kunnskap, seier Eline Paxal i Direktoratet for nødkommunikasjon.
Då ekstremvêret «Tor» herja langs kysten i januar i år, blei det den første store prøva for det nye naudnettet, etter at det blei landsdekkande.
Fleire plassar låg naudnettet i periodar nede under stormen, og ordførarar i fleire kommunar har sagt at dei er uroa for neste storm.
Store øydeleggingar
«Tor» førte til ei rekkje materielle skadar, særskilt i kystkommunar i Sogn og Fjordane, Møre og Romsdal og Hordaland.
- Ny vindrekord:
Kring 60.000 husstandar var utan straum i periodar medan ekstremvêret herja. Norske forsikringsselskap fekk inn over tusen meldingar om bygningsskadar.
Men også naudnettet blei råka av ekstremvêret.
Avgjerande i krise
I Norge var det totalt 121 basestasjonar som hadde nedetid under ekstremvêret. I Sogn og Fjordane var det totalt 33.
Det nye naudnettet blei opna for kommunikasjon mellom beredskapsetatane i Norge i desember i fjor.
Kring éin månad seinare, under ekstremvêret «Tor», spelte naudnettet ei avgjerande rolle for at etatane kunne fungere saman i ein kritisk situasjon.
– «Tor» var den første store stormen etter at naudnettet blei teke i bruk. Difor er det særs interessant å sjå kva som fungerte og eventuelt ikkje fungerte med tanke på stormen, seier Paxal.
Førebels rapport
I den førebelse rapporten går det fram at transmisjon var den største utfordringa for naudnettet.
– Vi er basert på bruk av eksisterande infrastruktur. Den er sårbar for straumbrot. Når straumen går ned, vil også naudnettet bli påverka av dette.
- Såg du denne?
Straumleverandørar, ambulansetenesta og fylkesberedskapstenesta er nokre av dei som blir undersøkt i granskinga.
– No vil vi sjå om det er noko vi kan gjere for å forbetre oss, seier Paxal.
Den endelege rapporten skal vere klar i løpet av mai.