Skal diskutere gruve med minister

Det skriv avisa Firda.

Naustdal kommune og ordførar Håkon Myrvang har sagt ja til Nordic Mining sine planar om å utvinne mineralet rutil i Engebøfjellet, men tidlegare denne månaden sette Miljøverndepartementet foten ned.

Solhjell vil ikkje seie ja til prosjektet slik det er no, og gav Nordic Mining eitt års utsetjing på søknaden om utsleppsløyve til gruvedeponi i Førdefjorden. Solhjell vil ha meir fakta på bordet, og lovar å sjå på saka på nytt når dette er på plass.

• LES OGSÅ: Seier nei til gruvedrift i Vevring
• LES OGSÅ: Nordic Mining overraska over nei - men Giske trur på «ja» til Engebø

Myrvang på si side meiner utsetjinga av planane er svært uheldig, og har vist til at det er viktig for både kommunen og regionen at ein får oppstart på prosjektet som kan gje mange arbeidsplassar i området.

Ordføraren har skulda ministeren for både trenering og obstruksjon, påstandar Solhjell seier til Firda at det ikkje er grunnlag for.

• LES OGSÅ: Same brevet med to ulike dateringar
• LES OGSÅ: - Gruveutsetting i strid med lova

Solhjell seier vidare at dei på møtet neste veke skal gå gjennom brevet om utsetjinga, og at departementet vil gje kommunen råd.

– Det er ei alvorleg sak å dumpe store mengder masse i ein levande fjord som produserer store verdiar. Eg trur både ordføraren og eg vil ha nytte av ein roleg diskusjon om mellom anna omsynet til sjømatnæringa, seier Solhjell til Firda.