Her er dei sju fremste politiske talenta i fylket

Aleksander Øren Heen, 25 (Sp)

Har bygd seg opp som den reelle opposisjonen i Årdal. Ei einsam svale i formannskapet som elles berre består av Arbeidarpartiet. I tillegg er han i ferd med å byggje eit solid fundament i fylkespolitikken der han har fått ein tredjeplass på fylkestingslista.

Tore Storehaug, 22 (KrF)

Har etter kvart lang røynsle som ungdomspolitikar. I Ungdomspolitisk utval her i fylket, og nasjonalt i KRFU. Der har han fått vervet som nestleiar med internasjonal politikk som fagområde. I tillegg har han fått andreplassen på KrF si fylkestingsliste. Dermed vil han markere seg meir i fylkespolitikken i åra som kjem.

Kristine Lie, 22 (Frp)

Vart i førre valkamp løfta fram av partileiar Siv Jensen som eitt av dei største talenta i heile partiet. Ho har vore vurdert som politisk rådgjevar i både i regjeringa, og i Bergen. Ho har så langt prioritert studiar framfor det mest synlege politiske arbeidet. Om ho heilhjarta vel politikken vil ho klatre fort.

Anita Nybø, 28 (Sp)

Lite synleg i media, men gjer ein traust innsats i sine mange politiske verv. Vurdert som ordførarkandidat i heimkommunen Bremanger. Gjev seg etter ein periode i fylkespolitikken.

Torbjørn Vereide, 25 (Ap)

Fylkespartiet sin mest markante ungdomspolitikar. Overlevde Utøya-massakren. Har markert seg med eit oppriktig engasjement for tradisjonelle ungdomssaker, som Ungdomskort og Kulturkort for ungdom.

Ole Gunnar Krakhellen, 28 (H)

Fylkets yngste ordførar nokon gong i ein alder av 25. Gjev seg etter ein periode. Men vil halde fram som fylkespolitikar, har fått ein litt usikker femteplass. Har gått gradene i Ungdomspolitisk utval. Har markert seg særskild som samferdselspolitikar på fylkestinget, men har god kontroll på dei fleste fagområde.

Sveinung Rotevatn, 27 (V)

Venstre sin kanskje mest synlege mannlege politikar. Har klippekort i alle nasjonale debattstudio. Tidlegare ungdomspartileiar, no stortingsrepresentant. Kåra til året europear av Europabevegelsen.