Alle av dei pågripne er i 20-30-åra, og med unntak av to personar pågripne i dag har alle erkjend kjøp, oppbevaring og sal av narkotika.
Så langt er ingen varetektsfengsla i saka.
- LES OGSÅ:
– Seks av dei vart pågripne i Sogn, medan den sjuande vart pågripen på Austlandet i går og frakta til Sogn, seier lensmann Åge Løseth ved Sogndal lensmannskontor.
Eitt kilo hasj
Politiet aksjonerte tysdag, og sidan har saka vakse i omfang. Til no har politiet teke beslag i kring ein kilo hasj, ein del marihuana og narkotiske tablettar.
Lensmann Løseth seier at dei pågripne er kjenningar av politiet.
– Politiet fekk ei viss interesse for eit bestemt miljø, som vi valde å gå grundigare inn i. Det resulterte i første tilslaget tysdag, noko som gav oss grunnlag for å gå vidare, seier Løseth.
– Saka er ikkje ferdig
Utan å forskottere noko straffereaksjon, seier Løseth at han reknar med at dei personane som så langt har vore inne til avhøyr vil måtte møte i rettssalen.
– Vi seier oss ikkje ferdige med saka. Etterforskinga går føre seg i dag, og vil halde fram i neste veke. Eg ser ikkje vekk ifrå at fleire kan bli pågripne i tida framover, seier Løseth.
– Kor stor er denne saka Ser de konturane av ei større sak?
– Eg vil tru at dette er ei av dei større narkotikasakene i Sogn, i alle fall dei siste ti åra, seier Løseth.