- Dette er rein utpressing, seier Bjørnarheim til avisa Firda Tidend.
82-åringen frå Breim har drive hundeoppdrett i fleire ti-år. Eit ektepar som tidlegare har kjøpt hund frå Bjørnarheim, tilbaud seg å passe hunden hans då pensjonisten skulle opererast for tre år sidan.
Men å få hunden tilbake skal vise seg å vere vanskelegare enn Bjørnarheim hadde trudd.
Skriftleg avtale
Hunden Bjønroas Pila vart overlevert i juni 2005. Begge partane skreiv under ein avtale, og Bjørnarheim tok farvel med hunden sin som då var eitt år gamal.
I avtalen er det presisert at ekteparet skal disponere hunden under utgreeing og gjennomføring av hofteoperasjonane.
Men ekteparet bad om å få ha Bjønroas Pila ei stund til. Bjørnarheim sa ja, men då han skulle hente hunden tilbake til Breim i sommar, vart ting plutseleg vanskeleg.
Hyra advokat
I august sendte Bjørnarheim e-post til ekteparet og sa opp avtalen. Men ekteparet vil behalde hunden, og meiner dei er førespeila eit eigarskap.
Bjørnarheim tok kontakt med advokat, som kravde hunden tilbakelevert i september. Hunden fekk dei ikkje, men heller ei rekning på nær 190 000 kroner for tre år i pensjon. Dersom ikkje Bjørnarheim betaler, stig kravet til 500 000 kroner.
Utpressing
- At dette vert gjort mot ein 82-åring gjer saka særleg kritikkverdig, seier advokat Asbjørn Berg.
Han sler fast at saka vert handsama som rein utpressing. Bjørnarheim ser det som eit forsøk på å skremme.
Er kjenningar i hunde-miljøet
Ekteparet ynskjer ikkje å kommentere saka. Dei skal ifylgje Firda Tidend vere profilerte i det norske hundemiljøet.