3. juli blei Sør-Vågsøy kyrkje i Nordfjord forsøkt påtent, og natt til sist onsdag klarte brannvesenet å avverje ein storbrann i Domkirken i Bergen. Der var det ein inngang bak kyrkja som blei forsøkt påtent.
– Det materialet som vi har samla inn no, vil bli samanlikna med det dei finn i Bergen. Så får vi sjå om det er ein link mellom desse to sakene, seier fungerande lensmann i Vågsøy, Tor Sæter.
Det er Fjordenes Tidende som først melde dette i si papirutgåve fredag.
Brukt tennvæske
Etter at nokon prøvde å tenne på hovuddøra på Sør-Vågsøy kyrkje, fann politiet ei flaske med tennvæske som dei reknar med blei brukt av gjerningsmannen.
– Vi var jo spesielt interessert i om nokon mangla ei blank Blåtind-tennvæske-flaske. Dette er ei litt eldre flaske, for dei som blir selde no er brune, seier Sæter.
- Les også:
- Les også:
Ber folk sjekke
Han oppmodar framleis folk om å sjekke i uthus, kjellarar og garasjar for å sjå om dei manglar ei slik flaske. Politiet trur at den eller dei som tende på kyrkjedøra har stole tennvæska ein eller annan stad.
– Vi har vore i kontakt med dei folka som har vore observert, og vi har avhøyrd ei rekkje vitne. Alle vi har snakka med har hatt status som vitne, og vi har ingen mistenkte, slår Sæter fast.
Ønskjer fleire tips
Dei får no hjelp av KRIPOS til å analysere materiale dei har funne, mellom anna for å kunne sikre seg eventuelle fingeravtrykk.
– Vi held alle moglegheiter opne. Det er rimeleg spesielt dette, så vi må ha alle teoriar opne. Vi avventar også om det kjem inn fleire tips i saka.