Sjåføren kraup uskadd ut frå dette vraket

– Køyretøyet skal ha køyrd vestover og kome ut av vegbana, og så dratt med seg autovernet fleire meter vidare over køyrefeltet, opplyser Frode Kolltveit ved Operasjonssentralen i Vest politidistrikt.

Så langt veit politiet ikkje noko meir om årsaka til ulukka på riksveg 15 ved Torvika mellom Stårheim og Nordfjordeid i Eid i dag.

Lastebilen var lasta med tauverk og skal ha blitt fjerna frå staden med hjelp av bilbergar.

Ingen personskade

Det skal vere store skadar på autovernet, og på sjølve lastebilen, men den utanlandske sjåføraren skal ha kome frå ulukka utan skader.

Føraren blei køyrd i ambulanse til sjukehuset i Førde for sjekk, der det også vil bli teke blodprøve.

– Det skal ikkje vere mistanke om rus, seier Kolltveit.

Ingen andre køyretøy skal ha vore involvert i ulukka, og føraren var åleine i bilen.

Oppryddinga tek tid

Vegen var stengt ein periode på grunn av ulukka, men entreprenørar frå Statens vegvesen driv no manuell dirigering på staden.

Ifølge Operasjonssentralen i Vest politidistrikt vil ikkje vegen vere ferdig rydda før seinare i kveld.

Før ulukka skal det vere meldt om vått føre på staden, men det skal ikkje ha vore is i vegbana.