Den tjuefemte utgåva av Førde Internasjonale Folkemusikkfestival er i gong, med talent frå heile verda. Eit av dei meir spesielle innslaga i år vart framført på torget ved Rådhuset.
Thang Long Water Puppetry er ei artistgruppe festivalen har prøvd å få tak i lenge. Dei representerer ein eldgamal tradisjon frå 1100-talet, som berre finst i Vietnam.
Tusenvis av liter vatn gjekk med for å fylle bassenget som utgjorde scena for førestillinga. Og arbeidet vart utført av det lokale brannmannskapet.
– Vi er borte i mange rare oppdrag, men denne var ny, seier Bernhard Øberg, leiar i Førde Brann- og feiervesen.
Under førestillinga verkar dokkene å leve sitt eige liv i vasskorpa. I staden for avslørande trådar, blir dokkene her styrt via bambusstokkar som er skjulte for publikum.
– Folk er nok veldig nysgjerrige på korleis vi kontrollerer dokkene, seier Ngyen Thi Bich Ngoe i Thang Long Water Puppetry.
Heile atten personar var i sving i bak scena for å skape mystikken.
– Eg trur det er difor at vårt tradisjonelle dokketeater er spanande for alle, både vaksne og barn, seier Phan dang Long.
KUNST: Den vietnamesiske dokkekunsten har eldgamle tradisjonar. Her blir dei vist fram for eit nysgjerrig publikum i Førde. (Video: Jostein Vedvik/NRK)
