Snart opnar Torvund - Teigen - her kan du bli med på ein prøvetur

– Det blir som natt og dag, seier prosjektleiar Sverre Måge i Statens vegvesen om korleis bilistane kjem til å merke forandring etter nyopninga.

Er du nysgjerrig på korleis det blir når den nye vegen står heilt ferdig om nokre vegar? Vi har filma ein av dei første turane på nyevegen frå start til slutt, videoen kan du sjå øvst i saka.

Opnar i desember

Måge seier entreprenørane no ligg i rute med dei siste oppgåvene før vegen står ferdig. Det er sagt at vegen skal opne i desember, men akkurat kva dag det blir er framleis litt usikkert.

– Vi ventar litt på respons frå den som skal opne strekninga, seier han og vil ikkje avsløre kven det blir.

• LES OGSÅ: Torvund-Teigen opnar 10. desember
• LES OGSÅ: Slutt på langstengingane på E39

(Artikkelen held fram under biletet)

– Det blir formidabelt

Det er nok ganske mange som ser fram til opninga av den nye vegen mellom Vadheim og Lavik på E39 i Sogn og Fjordane. Denne delen av strekninga har vore smal og kronglete, og spesielt over Torvundhovden har folk måtte smørje seg med tolmod både sommar og vinter.

Prosjektleiaren har sjølv køyrt strekninga mange gonger dei åra han har jobba med nyevegen. Han trur forskjellen kjem til å bli svært så merkbar for bilistane.

– Det blir formidabelt for bilistane. Dei slepp den høgda, der det som regel alltid er kø.

– Vegen er smal og kronglete, og det er heilt sikkert at folk kjem til å merke dette. Det blir som natt og dag, seier Måge til NRK.no.

Vil korte ned køyretida

Den nye vegstrekninga er om lag fem kilometer lang, av dette er 2,5 kilometer tunnel. Det betyr at den nye vegen vil vere om lag ein kilometer kortare enn dagens veg.

Kor mykje kortare tid folk vil bruke når nyevegen står ferdig meiner Måge det er vanskeleg å svare på, men han er klar på ein ting.

– Du vil tene ein del på det, seier han.

(Artikkelen held fram under biletet)

– Tålmodige bilistar

Anleggsarbeidet starta i august 2010, og det har til tider vore til hinder for trafikken på E39. Måge har tidlegare gitt ros til trafikantane som har måtte tole stengingar både seint og tidleg.

– Dei har teke det fint gjennom heile anleggsperioden, og det har vore lite eller ikkje klager frå trafikantane. Folk har vore veldig tålmodige, sa han til NRK.no tidlegare i haust.

Når det no berre er nokre veker att til opning er det enno ein del ting som står att. Mellom anna rekkverkarbeid, merking og andre småting.

– Men alt er i rute, lovar prosjektleiaren.