Sjå heile JuleLutt-konserten

Hopp til innhold

Under årets musikkgalla stod om lag 50 musikarar frå Sogn og Fjordane på scena for å gi deg ein konsert du aldri har opplevd før – inne på verket til Hydro i Høyanger.

Dette er artistane på NRK JuleLutt frå Høyanger:

Thea Hjelmeland frå Førde har hatt eit fantastisk år etter sleppet av albumet Solar Plexus. Ho fekk topp terningkast over heile linja, ein spellemannspris, Luttprisen og har gjort eit enormt antal konsertar i inn og utland.
Eva & The Heartmaker med Eva Weel Skram frå Sogndal i spissen har blitt ein av dei største popduane i Norge. Dei har spelt på alle dei store festivalane og haustar fantastiske kritikkar for all musikken dei lagar. Bandet har nett gitt ut ny singel frå albumet som kjem til neste år. Eva skal også delta på neste sesong av Hver Gang Vi Møtes på TV2 til våren.
Line Dybedal frå Selje la om til norsk når ho skulle satse for fullt. I haust kjem debutplata hennar, og så langt har alle låtane hennar vorte spelelista både i NRKP1 og NRKP3.
Steinar Karlsen frå Eikefjord er ein gitarist av stort kaliber. Han kom i haust med to album som viser hans store musikalske styrke.
Aleks Grey med Aleksander Raftevold frå Nordfjordeid i spissen er for tida spelelista i 20 land. Raftevold er ein ung musikar med store ambisjopnar. Han går for tida på Paul McCartney sin talentskule i Liverpool der også bandet har base.
Karl Seglem frå Årdal reiser verda rundt med musikken sin, men har alltid hatt eit nært forhold til heimstaden sin og til aluminiumsproduksjonen. Han lar seg inspirere av den unike hallen der konserten skal vere, og vil framføre musikk i nær kontakt med industrien.
Tina Refsnes frå Florø var ein av artistane under årets store Øyafestival. Ho får fantastiske tilbakemeldingar på musikken sin, og kjem i november med debutalbumet sitt. Her blir det stemningsfullt og vakkert i røffe omgivelser i anodehallen.
The Tubs frå Høyanger må sjølvsagt stå på scena når det er stor konsert i ein industrihall i Høyanger. Bandet har eit sterkt renome og ein del av det sterke rockemiljøet i industristaden.
Annika Beinnes frå Vadheim imponerte alle då ho song for heile Norge frå Sommarbåten til NRK i Høyanger i sommar. Den unge musikaren har stor breidde i sjanger, og blir den yngste på scena under NRK JuleLutt i år.
Lothe med Odd-Erik Lothe frå Kjølsdalen i Eid kjem med nytt album i januar, og har i år hatt fleire låtar på spelelistene til NRK P1. Lothe er ein av dei mest spelte artistane i P1 med sine låtar med Fabel og frå det nye bandet Lothe.
Rockebandet Spitfire frå Sunnfjord er som skapt for ein røff og tøff industrihall i Høyanger. Bandet har lagt bak seg suksessfulle turnear i utlandet, og kjem til Høyanger for å skape stor og roka stemning.
Finn Tokvam frå Flåm blir programleiar for konserten. Han er kjend frå mellom anna sine PILS-program på NRKP1. Tokvam vil sy det heile saman til eit TV-program som du vil kunne sjå på NRK1 TV i jula.