Mannen, som er asylsøkjar, blei pågripen av politiet måndag denne veka, mistenkt for å stå bak brannen det gamle kaihuset på Nordeide fredag.
I dag blei han framstilt for fengsling, og retten meiner at det er grunn til å mistenke mannen for forsøk på mordbrann.
Visste kvar brannen starta
Ifølgje avgjerda frå Fjordane tingrett skal mannen ikkje ha vore overraska over brannen, men skal ha uttalt at sikringsboksen brukte å vere varm.
– Sikta var på det tidspunktet ikkje orientert om at brannen hadde starta nettopp i rommet der sikringsboksen var, og i nærleiken av enn. Det er tale om eit hus med mange leilegheiter. Sikta knytte uoppfordra likevel brannen direkte til rett årestad, skriv tingretten.
- Les også:
Sa han ville øydeleggje
Vitne har forklart at mannen blei observert i det han drog frå bygget like før brannen blei oppdaga. Han skal også ha forklart til vitne to dagar før brannen at han ville øydeleggje eit rom i huset.
– Eit vitne har forklart om at sikta har truga med eldspåsetjing av ein bil berre dagar før brannen, skriv tingretten.
Brann i ein kommode
Brannen i det store murhuset på Nordeide ferjekai blei meld til alarmsentralen klokka 17.37 fredag ettermiddag, og var sløkt kort tid etter. Brannen skal ha starta i ein kommode.
Påtalemakta meiner det er fare for gjentaking, men tingretten meiner at mistanken mot mannen uansett er så sterk at han bør varetektsfengslast i fire veker medan politiet etterforskar saka.