1. mars i år overtek konsernet levering av vaskeritenester til GressGruppen. Partane har signert ei leveringsavtale for dei neste fem åra, som omfattar utleige og vask av tekstiler.
Det skriv konsernsjef Leif Gunnar Belsvik i ei pressemelding.
Tek over store delar av marknaden
Nor Tekstil har i alt 19 vaskeri i landet, og konsernet tilbyr vaskeri- og tekstiltenester til hotell, sjukehus, industriverksemder og handels- og serviceverksemder. Dei har i dag 750 medarbeidarar.
– Med denne ordren aukar Nor Tekstil sin årlege omsetnad til omlag 650 millionar kroner, skriv Belsvik i pressemeldinga.
– Totalmarknaden for vaskeritenester i Norge ligg på rundt to milliardar kroner i året. Med denne kontrakta får vi ein marknadsandel på over 30 prosent.
Treng fleire tilsette
Kontrakta vil få stor betydning for konsernet framover.
– Først og fremst må vi tilsette fleire produksjonsmedarbeidarar. Vi kjem også til å invistere for omlag 250 millionar kroner dei neste tre åra. 100 millionar av desse vil vere miljøretta investeringar, skriv Belsvik.
Nor Tekstil skal levere vaskeritenester til Rica Hotels, Hurtigruten, The Rezidor Hotel Group (SAS Hotellene), Norlandia Hotel Group, Fjordline, Torghatten og Compass Group Norge offshore og onshore (ESS, mellom anna installasjonane på Ekofisk).