– Det er heilt surrealistisk. Eg fekk gåsehud då eg såg ned på speedometeret, seier båtførar Leif Stavøstrand.
Saman med resten av gjengen i Evoy kunne han fredag føremiddag juble for at båten deira Evoy1 sat ny verdsrekord i hastigheit for elektrisk drivne båtar.
Gamal draum
Det var ikkje få som hadde møtt opp då Stavøstrand køyrde inn til det som inntil vidare står som uoffisiell verdsrekord i Florø i dag. For Stavøstrand og resten av entreprenørane i Evoy er dette ein draum som har tatt tid.
– Me byrja for 15 år sidan på dette prosjektet. Men det var vel for to år sidan at me bestemte oss for å lage desse hurtiggåande båtane.
– Då tenkte me det kunne vere eit fint mål å ta verdsrekord.
Den førre verdsrekorden var på 51,3 knop.
Sjølv om den rekorden blei teken med god margin, var ikkje Stavøstrand heilt sikker på om rekorden ville bli tatt.
– Me har faktisk ikkje gått over verdsrekord-fart før i dag, så det vart litt gambling. Eg trudde me skulle klare det, men ikkje så overbevisande, fortel han.
Nye mål
Stavøstrand fortel at neste steg no er å byrje å jobbe mot å få båten i serieproduksjon.
– Målet er å verte klar til å byrje å levere til våren.
Sjølv om verdsrekorden på fredag ikkje vert sett på som offisiell, så er Stavøstrand klar på at dei kjem til å prøve igjen.
– Me fekk bekrefta på torsdag at me ikkje fekk registrert rekorden, så då er det naturleg for oss å køyre fleire turar når me har fått meir varme i vêret.
– Då skal du ikkje sjå vekk frå at båten går enda raskare, seier han.
