Eid slit i botnen av 3. divisjonsavdelinga, men har ein målscorar som ligg heilt i toppen av toppscorarlista.
Søndag netta Torbjørn Aabrekk ikkje mindre enn fire scoringar då Eid knuste Åsane 2 6–1 på bortebane. I løpet av 12 minutt i første omgang scora han ekte hat-trick.
– Det er første gong eg scorar så mange mål i ein seniorkamp, men eg burde hatt i alle fall to-tre mål til, seier 17-åringen.
Delaktig i 29 av 47 mål
Med fire mål mot tabelljumboen er han eitt mål bak Niklas Lerpold (Arna Bjørnar), som er toppscorar i avdelinga med 18 mål.
Trenar Michael Sjöquist seier seg imponert over 17-åringen som skulle fylle skoa etter Christoffer Hafsås som reiste til 2. divisjonsspel med Førde i vinter.
Aabrekk er blitt ei viktig brikke for Eid.
– At han gjer mål er det andre som ligg bak, men han har også gjort ein heil del på eiga hand. I tillegg har han ikkje berre scora 17 mål, men han har 12 assist. Det vil seie at han har medverka på 29 mål i år, seier trenaren.
Ny eksport?
– Torbjørn er veldig god offensivt, men i dag var det svært gledeleg å sjå han ta så tungt defensivt ansvar. Han tok «skitjobben», legg trenaren til og trur det nye spisstalentet kan bli neste spelar som går frå Eid til klubbar høgare opp i divisjonane.
Frå før har Eid levert frå seg både Azar Karadas, Christian Kongsvoll (Sandefjord), Eivind Daniel Røed (Sogndal) og Hafsås.
– Du må utvikle deg heile vegen. Torbjørn er ekstremt bra offensivt, og eg vil sjå han utvikle seg endå meir defensivt. I dag tok han det med bravur, seier trenaren.
Fokus på skule
17-åringen tek suksessen med knusande ro. Han har spelt for samlingslaga til Sogndal på juniornivå, men elles har det vore lita interesse kring han som fotballspelar.
Aabrekk har også spelt kampar for aldersfastlagde landslag.
– Eg går på skule og konsentrerer meg om det. Eg tek det som det kjem, seier han.
– Eg er sikker på at interessa vil komme. Det er i år Torbjørn har teke steget. I fjor var han ikkje i nærleiken av det han har prestert i år, meiner Sjöquist som let seg imponere over arbeidet som blir lagt ned aldersfastlagd fotball i Eid.
Burde vore meir
Kampen i Åsane vart aldri spennande. Ved pause stod det 3–0 etter scoringar ved nemnde Aabrekk. Etter kvilen scora også Johannes Myklebust og Ove Balsnes. Aabrekk sette også inn sitt fjerde og kampens siste scoring.
Etter at Hordaland fotballkrins gav Saga medhald i protesten etter heimekampen mot Arna Bjørnar, er denne klaga inn for fotballforbundet. Førebels er det difor uvisst om Saga får dei tre poenga som vil vere viktige i botnstriden.
– Sigeren var utruleg viktig for å få att sjølvtilliten. No ligg det i våre eigne hender, og eg trur at vi skal klare å stå i divisjonen med dette laget, seier han.