I tillegg har jerven truleg stått bak enno eit kadaver. Fjelloppsynsmann Einar Fortun seier at jerven i år har drepe sauer rekordtidleg.
- Det er uvanleg tidleg dette året, normalt byrjar den ikkje å ta sauer før i august, seier han.
Trur jerven vil ta mange
Sauekadavera som er funne i Guridalen er truleg tre eller fire dagar gamle. Fortun skal altså opp å sjå på eit fjerde kadaver i dag, men det er all grunn til å tru at også det er drepe av jerv. Med rovdyret så tidleg i fjellet trur Fortun langt fleire sauer vil bli drepne.
- Fortvilande
Dei siste åra har bøndene i området sett i verk fleire tiltak for å verne seg mot jerven. Men no ser bonde Steinar Mørkrid med frykt på kva han har i vente.
- Det er fortvilande for oss. Vi har flotte beiteområde og det er trist at sauene ikkje kan få gå i fred. Det går feil veg med jerveproblemet, seier han.
Søkjer om fellingsløyve
Truleg er det minst to jervar som har vore på ferde. No har bøndene kontakta fylkesmiljøvernsjefen i håp om å få fellingsløyve, men Mørkrid trur jakta blir vanskeleg.
- Det er veldig vanskeleg. Det er flaks viss ein greier å avlive jerven, seier han.
Også gaupe på ferde
Og fleire rovdyr herjar i same kommune. Fjelloppsynsmann Einar Fortun var på Indre Hafslo i går. Der vart det konstatert at eit sauekadaver som vart funne er drepen av ei gaupe.
