For Sogndal avfeia all motstand, vann 2-0 og kan starta feiringa av opprykk til eliteserien. Med fyrverkeri på stadion like etter kampslutt vart spelarar og trenarar hylla for ein enorm prestasjon.
- LES OG:
Tommy Øren matchvinnar, igjen
Jubelen stod like eins i taket i garderoben etter kampen, og i sentrum for jubelen Tommy Øren.
Helten frå Ullevål i 2000 rundlurte Piiroja og ga Sogndal 2-0. Dermed var Fredrikstad feia av bana.
- Det er heilt ubeskriveleg herleg. Då eg forstod at ballen gjekk i mål var det mange rare tankar som streifa gjennom hovudet. Å vera med på endå eit opprykk er fantastisk, stråla 30-åringen som no er heilt sikker på at han går på ein ny sesong.
- Det går ikkje an å gje seg etter dette, var den klare meldinga til sogndal-leiinga.
Sogndal var best
Det var aldri tvil om at Sogndal var best. Særleg i andre omgang var det eit svært godt sogndallag som bestemte takt og tone.
Laget Sogndal har knapt spela betre i år, og då Per Egil Flo og Tommy Øren ga Sogndal ei 2-0 leiing, var det sydlandsk mellom snøbyene på Fosshaugane.
Skryt frå fotballpresidenten
Til og med fotballpresident Yngve Hallén måtte innrømma at det var sterke saker.
- Klart Sogndal er laget i mitt hjarta, uansett kva verv eg har. Betre følelse enn dette kan eg knapt ha. Eg er stolt og veit kva dette betyr for Sogndal, seier Hallén i jubelscenane på Fosshaugane.
I garderoben dansa Barry Kader på bordet, skikkeleg afrikanske rytmar til vill jubel og full allsong frå spelarar og alle involverte.
Sogndal er igjen i eliteserien.
Ein fantastisk sesong vart krona med 2-0 over den argaste konkurrenten Fredrikstad på heimebane. Betre kan det ikkje bli.
