– Det gler meg meir enn eg kan forklare.
Då Saed Bariise (45) kom til Noreg i 2012, hadde han eit sterkt ynskje om å jobbe som lærar, slik som i heimlandet. Han la difor inn ekstra innsats og lærte seg språket.
– Eg nytta sjansen Innvandrarsenteret i Florø gav meg til å lære meg norsk, og har lest og skrive mykje. Eg snakkar ikkje perfekt, men eg kan kommunisere godt.
Mange om beinet
Etter berre eitt og eit halvt år på Innvandrarsenteret fekk han språkpraksis eit halvt år på Krokane skule. I språkpraksis praktiserer flyktningane norsken sin, i tillegg til å få eit innblikk i arbeidslivet.
I fjor fekk trebarnsfaren frå Somalia 50 prosent stilling som lærarassistent. Rektor Bjørg Aslaksen seier norsken hadde mykje å seie for tilsetjinga.
– Vi såg i språkpraksisen at han forbetra norsken sin betrakteleg. Han gjorde ein aktiv innsats for å bli god i norsk, seier ho.
- Les også:
Skulen tar inn ein til to innvandrarar i praksis i løpet av eit år. Det er mange om beinet, men grunna økonomi er det få som får jobb vidare.
– Vi valde Bariise fordi han har pedagogisk bakgrunn og ein god personlegdom som passa godt inn hos oss. Då han fekk jobb hadde vi også eit lite fleirtal av elevar frå Somalia, og då passa det godt at han var eigna, fortel rektor Aslaksen.
Fleire ansvarsoppgåver
Saed Bariise byrja som morsmålsassistent, men har no moglegheit til å hjelpe alle elevar i 1., 2. og 4. klasse med oppgåver og konsentrasjon.
Somaliaren held spesielt auge med dei framandspråklege elevane, og hjelper dei å forstå spørsmål frå læraren. Han jobbar også i grupper med enkeltelevar som treng oppfølging, med blant anna lesing og omgrepstrening.
– Korleis er Saed som assistent?
– Han er det eg kallar eit gullfunn. Han har ein naturleg autoritet, han ser barna, er fagleg dyktig – så han kan hjelpe på dei fleste faglege områda, seier Aslaksen.
- Les også:
Bariise fortel at alle kan få jobb om dei verkeleg ynskjer det.
– Om ein person har vilje og innovasjon trur eg ein kan få jobb. Eg var heldig, sjølv om eg hadde erfaring som lærar. I undervisninga skrytte lærarane av meg, og då gav rektoren meg sjansen.
45-åringen er glad i jobben han har, men drøymer om å utdanne seg til lærar.
– Målet mitt er å bli lærar, sjølv om utdanninga tar lang tid. Assistentstillinga er difor ein god start for meg.