Så stygg kan ein idrettsskade vere

- Leggbeinet er forholdsvis knust, og legane seier at det er ein alvorleg skade til å vere ein idrettsskade. I verste fall kan det vere snakk om at karrieren er over, seier Martin Berntsen .

Til sjukehus i ambulanse

Den profilerte Førde-spelaren gjekk under søndagens elitekamp mot Kristiansund i bakken, etter at han kolliderte med lagkamerat Geir Eithun i forsøket på å få tak i ballen.

• LES MEIR: Tapte høgdramatisk kamp

I møtet med bakken landa Berntsen forkjært. Han måtte til sjukehus i ambulanse.

- Eg har det etter forholda ganske bra no. Eg har ikkje smerter eller noko, men veit ikkje meir før eg vert operert, seier volleyballspelaren.

Leggbeinet vart knust

Etter planen skal Berntsen under kniven på tysdag. Etter det NRK forstår, ventar ein komplisert operasjon for å retta opp skaden i beinet.

For øvst på leggbeinet er skadane omfattande: Då Berntsen landa etter opphoppet, small lårbeinet så hardt saman med leggbeinet at sistnemnde vart splintra eller knust.

Skaden er ein tilsvarande skade som mellom andre kjende fotballspelarar som Ruud Gullit og Lothar Mathäus i si tid vart sett ut av spel med.

(Artikkelen held fram under biletet)

Håpar å komme tilbake

No ser Berntsen for seg å gå med skruer og plater i kneet ei god stund framover.

- Legane seier at det vil gå 12 veker før eg kan belaste beinet skikkeleg. Så ser eg for meg ein god treningsperiode etter det, seier kantspelaren.

Berntsen er ein av dei viktigaste spelarane på Førde, og han har ei rekkje kampar for det norske landslaget. To gongar har han vore kåra til årets beste spelar i eliteserien.

I fjor gjekk nesten heile sesongen fløyten på grunn av ein prolaps i ryggen.

- Eg har vel fått min dose. Denne skaden er nok den mest alvorlege, men eg håpar å komme tilbake denne gongen også, seier 32-åringen.