– Eg var så glad. Det betyr så veldig mykje for meg å vinne desse kampane, seier Christian Kalvenes.
Han hadde tre og eit halvt år på Fosshaugane på starten av 2000-talet, og var med på oppturen i eliteserien med Torbjørn Glomnes og den legendariske 80-generasjonen.
Fredag møtte han igjen gamleklubben. Resultat: 2-0 på heimebane.
LES OGSÅ:
Har sterke kjensler for gamleklubben
– Eg har merkt på kroppen i heile dag at det var ein spesiell kamp. Det er spesielt å møte gamleklubben. Eg var jo der i mange sesongar, og kjenner heile trenarapparatet, seier Kalvenes.
Han var for det meste venstreback i tida i Sogndal, men var midtstoppar i kampen på Brann stadion. Den rutinerte forsvarsspelaren hadde stort sett kontroll på det som kom av forsøk frå sogningane.
– Eg har sterke kjenser for Sogndal. Så på den eine sida er eg glad for å vinne, men på den andre sida håpar eg Sogndal vinn alle andre kampar enn mot oss, seier han.
- LES OGSÅ:
Trur Sogndal vil ta poeng framover
Brann trekte det lengste strået etter raske mål av Diego Guastavino og Bjarte Haugsdal - det siste var ei real keepertabbe av Kenneth Udjus.
– I andre omgang kom Sogndal meir med i kampen, og dei kunne fort ha scora eit mål. Samstundes fekk vi meir rom, og dei to måla var spikaren i kista, seier Kalvenes.
– Det var ein jamn kamp, og eg trur nok Sogndal vil ta ei del poeng framover.
(Artikkelen held fram under biletet)
Var aktuelt med Sogndal-retur
Då Kalvenes skulle heim frå det fire år lange proffopphaldet i Skottland og England, byrja rykta å svirre om ein retur til Sogndal.
Kalvenes vedgår at det var oppe til diskusjon i familien.
– Eg kunne godt tenkt meg det, for eg hadde det kjempeflott i Sogndal. Men det var meir naturleg å flytte til Bergen med familien, seier han.
– Du angrar ikkje på det, no som Brann klatrar på tabellen?
– Det er alltid kjekt å liggje på øvre halvdel. Men det blir tøft mot Viking i neste kamp. Det blir ein viktig kamp både for oss og Sogndal.
– Eg håpar eg kan rekkje ut ei hjelpande hand der, seier Kalvenes.