Det betyr at Høgskulen si avdeling i Sogndal kan få eit eige årsstudium som skal utdanne folk til å bli personlege trenarar.
Instituttleiar for idrett Kari Aaberge ved Høgskulen i Sogn og Fjordane seier trongen for ei slik utdanning er veksande.
– Vi ser at det er der det er eit stort behov. Dei vi utdannar i Sogndal over tre år er veldig ettertrakta.
Vil gripe tak i trenden
Norge er det landet i Europa med flest treningssenter per innbyggar. No er det litt over 5000 innbyggarar per senter, i fylgje bransjeorganisasjonen Virke trening.
Men konkurransen hardnar også til, og stadig fleire ynskjer ein personleg trenar som kan ta tak og lage personlege opplegg til kunden. Den trenden ynskjer dei å gripe fatt i ved idrettsutdanninga i Sogndal.
– Folk ønskjer å vere i fysisk aktivitet og dei ønskjer å ha rettleiing. Det er kanskje litt farleg å analysere korleis framtida vi, men vi føler at etterspurnaden er der no og at den er veksande, seier Aaberge.
– Må møte bransjen sine kompetansekrav
Bransjeorganisasjonen Virke Trening ser at fleire ynskjer å tilby utdanningar til bransjen.
Direktør Anne Thidemann, vil ikkje kommentere satsinga i Sogndal spesielt, men seier utfordringa for bransjen no er å sikre at studia blir tilpassa dei behova som treningssentera faktisk har. Dei har no starta eit kompetanseprosjekt der dei vil kartlegge kva som er framtida sitt behov på dette feltet.
– I dag er det mange utdanningsinstitusjonar som gjev tilbod med ulikt innhald. Vi ønskjer å ha handa på rattet og vere tydelege overfor utdanningsinstitusjonar på kva innhald utdanningsløpa bør ha for å kunne møte bransjen sine krav til kompetanse, seier Thidemann.
I Sogndal skal studentane etter planen få kunnskap innan trening, anatomi, og korleis ta omsyn til kundane. I tillegg skal ein lære om ernæring og det å sjå treningssenterbransjen i eit samfunnsperspektiv.
– Det å få rettleiing er viktig for å trene riktig. Og så ser vi at folk er så travle at dei vil vere effektive på alle område, også her, seier Aaberge.