Så nærme var Johnny å bli treft av kampesteinen

Amatørvidoen til Ole Martin Gilbu dokumenterer godt dramatikken på E16 ved Skjerpi i Aurland.

Store steinblokker losna frå fjellsida og dundra mellom 700 og 900 meter ned mot den sterkt trafikkerte hovudfartsåra mellom Oslo og Bergen.

• Les også: Fleire tusen kubikk kom ned - fleire hundre ligg att

– Heilt utruleg! Det er berre flaks at det ikkje gjekk liv tapt med desse steinane, kommenterer Gilbu.

Sakte kino

Berre nokre minuttar tidlegare prøvde han og Jan Eide fiskelukka ved fredfulle Nærøydalselvi. Elvesusen og lyden frå sommartrafikken vart brått overdøyvd av buldring frå fjellsida.

• Les også: Framleis fare for ras i Gudvangen

– Eg var på veg ut i elva og snudde meg. Då såg eg heile fjellsida sleppe som i sakte kino. Då skjønte eg alvoret, kasta stanga og sprang etter Ole Martin, fortel Eide.

• Les også: Vegen kan bli stengd i fleire dagar

– Eg høyrde trafikken på vegen heile tida, og så såg eg svære blokker på veg ned. Men eg trudde ikkje at steinane var så svære som dei var. Då dei kom rundt meg forstod eg alvoret. Steinane var store som hytter, legg han til.

Ville ikkje la seg stogge

Oppe ved vegen hadde far til Gilbu, Roar Gilbu, og Johnny Steensen kome dei i forkjøpet. Dei var allereie i gang med å stogge trafikken. Samstundes hagla steinane rundt dei.

• Les også: Fryktar reiselivstap grunna Gudvangen-ras

– Med den trafikkmengda som er på vegen, så skjønte vi kva som ville skje. Vi stogga kring ti bilar. Enkelte fekk panikk, fortel Roar Gilbu.

• Les også: – Eg trur vi redda seks eller sju liv i dag

Men ein utanlandsk vogntogsjåfør hadde ingen planer om å la turen mot Bergen bli stogga av eit steinras i Aurland.

Få meter frå å bli treft

I eit forsøk på å komme seg forbi rasområdet la sjåføren seg ut og sperra for møtande trafikk. Han vart akkurat nok hindra til ikkje å bli treft av ei svær steinblokk som dundra inn i på E16. Til alt hell vart ingen andre bilar trefte heller.

Steinen la seg nokre få meter frå Steensen.

• Les også: – Store steinar, større enn bilar stengjer E16

– Akkurat i den situasjonen oppfatta eg ikkje kor nær det var, men å sjå det slik gjer meg litt meir shaky, seier Steensen, som driv campingplass i området.

Kunne gått skikkeleg gale

– Det kom småstein som kanonkuler. Og steinar, som i alle fall var dobbelt så store som den som la seg i vegbana, susa over vegen og ned mot elva. Vegen ned til fiskeplassen er øydelagd. Der ligg det no ei stor steinblokk, seier Eide

Ei steinblokk stogga i to grantre, berre ti meter frå bilen han har sove i dei siste fire nettene.

– Eg tenkjer på kor nærme det var å gå skikkeleg gale, seier han.

– Dumdristig

– Det var kanskje dumdristig å reise opp att, men eg trur det var med på å berge liv. Vi såg kva som skjedde, og det gjorde ikkje trafikken som kom, seier han.

At innsatsen til Gilbu og Steensen berga liv denne dramatiske ettermiddagen er ikkje ordførar i Aurland, Noralv Distad (H), i tvil om.

• Les også: Ordføraren hyllar rasheltane

– Innsatsen til dei som var på rasstaden er heilt fantastisk. Vi er veldig glad for at det ikkje gjekk liv tapt, seier Distad.