Så mykje vil bomringen koste

– Med rabatt og bombrikke vil prisen ligge på 20,80 kroner for ein personbil, opplyser prosjektleiar Arve Seger i Førdepakken.

• Les også: Klart for storstila bompengeprosjekt - Stortinget har vedteke Førdepakken

Ingen rabatt for tungtransport

Styret for bompengeselskapet har no sendt den formelle søknaden om endelege takstar til godkjenning. Utan rabatt vil det koste 26 kroner for ein personbil å passere Førde sentrum. Det gjeld både lokaltrafikk og gjennomgangstrafikken på E39 og riksveg 5.

– Det vil bli sett opp fem bomstasjonar rundt sentrum. Arbeidet tek til om ikkje lenge. Planen er å starte innkrevjinga 1. oktober, forklarer Seger.

Mens personbilar med rett abonnement og bombrikke i frontruta får rabatt, blir det ingen prisavslag for tunge køyretøy, som må ut med 47 kroner per passering. Etter planen skal bompengeinnkrevjinga vare i 12 år.

Sjølve bompengeprosjektet vart godkjent i Stortinget i juni i fjor. No blir det opp til vegstyresmaktene å godkjenne bomtakstane.

30 passeringar

– Vi har sendt inn søknad til Vegdirektoratet og Samferdsledepartementet. Vi håpar å ha fått svar innan slutten av mai, slik at vi kan ha dette klart når vi skal gå ut med detaljert informasjon, seier Seger.

For dei som har bombrikke blir det sett eit tak på maks 30 passeringar i månaden. Trafikk utover dette vil ikkje bli kravd avgift. I tillegg blir det innført ein timesregel, slik at ein ikkje betaler to gonger, sjølv om ein skulle passere hyppig.

Funksjonshemma med parkeringskort som har brikke, vil ikkje bli kravd for bompengar. Elektriske bilar får fritak i samsvar med Stortinget sitt vedtak.

• Les også: Regjeringa seier ja til Førdepakken

7488 kroner per år

For personbilar vil det maksimalt koste 624 kroner per månad for 30 passeringar. Det gir ein årleg pris på 7488 kroner per bil.

Tunge køyretøy får ein maksimal månadspris på 1410 kroner, eller 16.920 kroner for eit år.