Her blir det bom stopp for Frp sin draum

Dermed gjekk det som venta då politikarane i Førde handsama den såkalla Førdepakken torsdag ettermiddag.

– Resultatet blei det same som når bystyret og formannskapet har handsama denne saka fleire gonger før. Det er eit fleirtal for Førdepakken og det er eit fleirtal for å delfinansiere det med bompengar, og det blei det i dag også, seier ordførar i Førde, Olve Grotle, til NRK.

• LES OGSÅ: Her kan det bli bomstasjonar frå 2015

Store investeringar

Han sler fast at Førdepakken er ein veldig viktig og stor oppgradering av vegane i Førde sentrum.

– Vi skal byggje vegar for 1,5 milliardar. Det er vi nøydde til å få på plass dersom vi skal få den veksten som vi og alle andre meiner er nødvendig, seier Grotle.

Førdepakken inkluderer mellom anna ei storstila satsing på gang- og sykkelvegar i Førde, samt tiltak for å lette trafikken som skal gjennom sentrum og vidare.

Letta over fleirtal

Han er letta over at heile bystyret, med unntak av Frp sine to representantar sa ja til både Førdepakken og finansiering med bompengar.

– Eg er letta fordi vi no er ferdig med ein prosess i kommunen, som inneber bruk av ressursar, bruk av tid. Eg er glad for at vi no har komne i mål med dette, og eg er glad for at debatten har vore så ryddig, meiner ordføraren.

• LES OGSÅ: Han har samla inn 639 underskrifter med krav om folkerøysting om bompengar
• LES OGSÅ: Så negative er folk til bompengar

– Vi har stått ganske åleine

Leiar i Førde Framstegsparti, Bjørg Sølvi Refvik, var ikkje overraska over at dei gjekk på eit solid tap i bystyret.

– Vi veit at vi har stått ganske aleine om dette. Vi meiner at når det er så mykje pengar som skal inn, så meinte vi at folk sjølv måtte få vere med å bestemme om dei ville dette her. Difor fremja vi forslaget om folkerøysting, og stod på det, seier Refvik til NRK.