Sa ja til eigedomsskatt i går - vil seie nei neste gong

– Vi måtte gjere det slik, for vi måtte gå for eitt av to vonde, fortel Anne-Lise Drage, som er ein av Framstegspartiet sine to representantar i formannskapet.

Kommunen er i ein særs utfordrande situasjon og har eit underskot som nærmar seg 10–15 millionar kroner, og det må kuttast.

Innføring av eigedomsskatt har vore eit stridstema i kommunen i lang tid, og då budsjettsaka var oppe til diskusjon onsdag, gjekk eit samrøystes formannskap inn for å innføre eigedomsskatt på bygg som ikkje driv med næring. Denne inntekta vil gje kommunen 2,15 millionar meir å rutte med.

– Vi gjekk inn for ordføraren sitt forslag, der Flatraket skule og sjukeheimsavdelinga ikkje vart rørt, men eigedomsskatt låg inne, seier Drage.

• LES OGSÅ: Her ventar dei brutale kutt
• LES OGSÅ: I 2009 jubla dei over å vere ute av Robek-lista - no er dei på full fart inn att...

Ho og partiet sin andre representant ville heller støtte eit slikt forslag, enn det som rådmannen hadde fremja, der eigedomsskatt på næringsbygg, nedlegging av Flatraket skule og ei sjukeheimsavdeling låg inne.

Ordføraren håpar på semje, men Frp vil snu igjen

Ordførar i Selje, Ottar Nygård, frå Tverrpolitisk Liste, er nøgd med vedtaket i formannskapet, og håpar i det lengste at det også blir vedteke av kommunestyret når saka skal opp der.

– Det er vanskeleg å førespegle, men eg reknar med at det denne gongen blir fleirtal i kommunestyret for eigedomsskatt. Noko anna ser eg på som uverkeleg i høve den situasjonen vi er i no. Eg trur og håpar det blir ein realitet, seier ordføraren.

• LES OGSÅ: Her er kommunekassa botnskrapt - og no ventar nye kutt
• LES OGSÅ: Fortvila og provoserte over at skular kan forsvinne

Skal ein tru Drage, så må nok ordføraren sjå langt etter eit samrøystes vedtak i så fall.

– Vi hadde ikkje tid til å legge fram vårt eige budsjettforslag, det hadde ikkje dei andre partia heller. Vi har gjeve beskjed at vi vil legge fram eit eige forslag, og vi vil bruke tida fram til kommunestyremøtet på eit slikt forslag. Vi har slett ikkje endra meining om eigedomsskatt. Vi må finne ein veg ut av uføret her, seier Frp-representanten.