Eit stort fleirtal av innbyggjarane i Førde er negative til å betale bompengar for å få bygd ny E39 utanom sentrum av byen.
Innbyggjarane sa nei
Ei meiningsmåling som vart gjort på oppdrag av Framstegspartiet tidlegare i vår viste at 52,9 prosent av dei spurde er negative til bompengar.
- LES OGSÅ:
- LES OGSÅ:
Bystyrepolitikarane i Førde har likevel gått inn for bompengefinansiering for å få realisert den såkalla Førdepakken.
Det inneber at E39 skal gå i tunnel utanfor sentrum av Førde. Ein reknar med at prosjektet bil koste 1 milliard kroner.
Går vidare med arbeidet
– Vi ønskjer å finne ut om bompengefinansiering kan gjere at vi får fortgang på å få til den såkalla Førdepakken. Det er også viktig at vi får løyst dei trafikale problema vi har i Førde sentrum, det seier gruppeleiar Jorunn Eide Kirketeig i Førde Ap.
Politikarane har no bede rådmannen om å gå vidare med arbeidet. Det vil seie at kommunen vil be Vegvesenet om å greie ut bompengar som ei mogleg finansiering av Førdepakken.
– Dei trafikale problema i Førde gjer at utviklinga av byen stoggar opp. Difor meiner vi det er svært viktig å finne ei løysing. Bompengar kan vere del av dette, seier Kirketeig.
Djuvik: – Eg er veldig skuffa
Bystyrerepresentant for Førde Frp, Frank Willy Djuvik er djupt skuffa. Saman med den andre representanten frå Framstegspartiet stemte dei mot bompengefinansiering.
– Eg er veldig skuffa over at fleirtalet i dag gjekk inn for bompengering rundt Førde. Dette går heilt på tvers av det folk i Førde vil, seier Djuvik og viser til meiningsmålinga som vart gjort for kort tid sidan.
Djuvik meiner også vedtaket kjem på eit for tidleg tidspunkt.
– Vi veit ikkje ein gong kva Førdepakken inneheld. Kor mange kommunale og fylkeskommunale vegar skal den til dømes innehalde? Det veit vi ikkje, seier Djuvik.
– Dette vert heilt feil
Frp-politikaren er provosert over fleire andre politikarar i byen, som ifølgje Djuvik har hevda at bompengar er siste utveg.
– Dei har ikkje prøvd noko anna. Det har ikkje vore eit politisk press frå Førde inn mot verken Fylkeskommunen eller statlege styresmakter. Då vert det feil å berre gje innbyggjarane rekninga utan å ha kjempa, seier Djuvik.
Frp fremja i bystyret forslag om å få til ei folkerøysting om kor vidt innbyggjarane vil ha bompengar, men dette vart nedstemt.
– Dersom innbyggjarane hadde sagt ja til bompengar, ville også eg kunne sagt ja til det, seier Djuvik.