To menn i 20- og 30-åra sit i arresten i påvente av å bli rusfrie så dei kan avhøyrast etter dramatikken torsdag kveld.
Først nekta dei å stogge for ein trafikkontroll i Førde, før dei i høg fart vende nasen mot vest. Med politiet på hjul.
– Innleiingsvist var farten så høg at vi av tryggleiksmessige omsyn avbraut allereie ved Erdal, fortel operasjonsleiar Einar Vereide ved Sogn og Fjordane politidistrikt.
Lurte politiet
I alt tre politipatruljar frå Førde og Florø deltok i aksjonen. Ved Eikefjord vart det sett opp stopp-post i eit forsøk på å stogge mennene. I staden svinga mennene av ved Storebru og inn på fylkesveg 615 i retning Hyen.
På ei strekkje mista føraren kontroll på bilen som brasa ut av vegen ved Krokstadvatnet. Då skal farten ha vore kraftig redusert i høve til farten mennene hadde ut av Førde. Ingen vart skadde i uhellet.
– Vi mistenkjer køyring i rusa tilstand og har sikra oss blodprøve av begge to, seier Vereide.
Må bli rusfrie
Kring 50 minutt etter at dei susa forbi kontrollen i Førde, vart mennene pågripne og tekne med til blodprøvetaking. Den eine skal vere heimehøyrande i området.
Ingen av dei hadde førarkort på bil.
Seinare vart mennene sett i arresten i påvente av å bli rusfrie så dei kan avhøyrast av politiet.