Innbrotsraidet stogga på Askøy – no har rumenar i 20-åra erkjent innbrot i Førde

Tjuvane parkerte bilen og stakk av etter innbrotet i Førde natt til 7. november. Under ei veke seinare gjorde dei det same på Askøy i Hordaland.

For den eine enda innbrotsraidet på Vestlandet der.

• Les også: Kan knytast til 30 andre innbrot

– Dei vart observert i samband med eit forhold på Askøy. Ein av dei to vart pågripne etter ein liten leiteaksjon, seier Bernt Erik Olsen ved eininga for mobile vinningskriminelle i Hordaland politidistrikt.

Utvida sikting

Medan mannen har sete varetektsfengsla sidan pågripinga, har politiet lukkast å knyte mannen til innbrotet i Førde. Ved siste rettsmøtet for få dagar sidan, erkjende han også innbrotet.

• Les også: Tjuvane prøvde seg på safen, men fekk ikkje napp

Olsen ynskjer ikkje å gå inn på kva mannen har forklara.

– Men det blir teken med i siktinga ved neste høve. Til no er han sikta for fire forhold i Hordaland, men vi jobbar vidare med å sjå om han kan knytast til ytterlegare forhold i Hordaland og andre distrikt, seier Olsen.

– Er det snakk om mange forhold?

– Vi har ei liste over saker i Hordaland og Sogn og Fjordane, så det kan dreie seg om ein god del forhold, ja.

Store verdiar

Same natta som innbrotet ved Biltema, var tjuvar også inne på Coop Marked på Vassenden i Jølster . Heller ikkje der vart det stole noko. Rumenaren er førebels ikkje knytt til dette innbrotet. Etter det NRK kjenner til er mannen eit til no ukjent blad for norsk politi.

Han har så langt samtykka til fengslingane. Den siste gjeld fram til 9. januar.

– Det er tale om tjuveri frå verksemder, forsøk på tjuveri, brukstjuveri av motorvogn og registreringsskilt. I stole gods og skader, så er det samla sett snakk om relativt store verdiar, seier Olsen.

– Vi veit det var to gjerningspersonar i Førde. Kva med den andre?

– Vi jobbar vidare med å identifisere kven den andre gjerningspersonen kan vere.