Sogndal Filmfestival har fått inn 75 filmar - fem fleire enn i fjor.
Og arrangørstaben er svært nøgde med responsen.
– Vi konstaterer at vi har fått utvida festivalen slik vi håpa. Vi har fått inn mange filmar utanfrå fylket, Hordaland, Rogaland og Møre og Romsdal. Og det er jamt høgt nivå på filmane, fortel festivalsjef Synne Haga.
Vanskeleg for jury
Måndag brakar det laust, for åttande gong på rad med filmfestival i Sogndal. Som vanleg er det 3. klasse ved medielinja ved Sogndal vidaregåande skule som står bak arrangementet.
Under filmfestivalen blir det vist mykje film og det blir mange foredrag. Om kvelden den 18. mars blir det gallakveld der prisane blir delte ut.
Festivalsjefen seier juryen fekk ein utfordrande jobb med å finne dei ulike vinnarane blant 75 bidrag.
– Juryen var nøgde med filmane og fekk meir enn ein kveld med filmsjåing. Du kan trygt seie at ikkje alle vinnarane vart samrøystes. Diskusjonen har gått fram og tilbake om kven som skal vinne og kvifor ikkje, humrar Haga.
Utvida festival
Det blir delt ut prisar i fleire kategoriar: Publikumsprisen, i samarbeid med NRK Sogn og Fjordane, beste regi og manus, beste animasjon, beste dokumentar, Juniorprisen (til og med 16 år), sportspris, beste fiksjon og beste etterarbeid.
I år er det rekordmange som kjempar om prisane. Dei fleste bidraga kjem frå Akademiet i Bergen, Mo og Jølster vidaregåande skule og Sogndal vidaregåande skule.
– Det hjelpte godt på å utvide, og neste år vil vi utvikle oss endå meir. Då håpar vi på endå fleire filmar utanfrå fylket, seier Haga.
Publikum røysta
Lesarane til NRK Sogn og Fjordane fekk fram til måndag 18. mars klokka 12 vere med å stemme fram vinnaren av publikumsprisen.
Publikumsprisen går til den filmen som får flest røyster på nettsida til NRK Sogn og Fjordane. Vi stiller med premien, som er eit flott kamera til ein verdi av om lag 7000 kroner.