Rognsø gav seg som trenar for A-laget til Florø etter at laget hans spelte siste kamp på søndag. Som øvste sjef for Sogndal startar han 1. januar 2019.
– Dette er ein jobb eg har ekstremt lyst på og som eg er svært glad for at eg har fått. Saman med folka her og anlegget har Sogndal enorme mogelegheiter til å skape utvikling. Her har vi mogelegheiter som eg ikkje ser i Florø, i alle fall ikkje på kort sikt, seier den tidlegare Florø-trenaren til NRK rett etter pressekonferansen der han vart presentert.
Vart klappa av banen
Terje Rognsø tok over som trenar for A-laget til Florø i 2010. Men alt i 2007 starta han opp «fotballakademiet» som eit tilbod til spelarar i dei to klubbane Tempo og Florø SK. Dette var starten på eit aldri så lite fotballeventyr. Satsinga skaut fart og det tok ikkje lang tid før ein gyllen årgang starta å markere seg på både krins- og aldersbestemte landslag.
Vil ikkje vere trenar
Han avviser at han gav seg som trenar for å flytte til Sogndal. Og sjølv om Florø hadde berga plassen i 1. divisjon ville han gjort det same.
– Eg ønskjer ikkje å vere fotballtrenar lenger, og det har eg vore klar på ganske lenge overfor klubben, seier den profilerte fotballmannen.
Brei erfaring
Rognsø, har i tillegg til lang fotballerfaring, ei karriere som gründer og bedriftsleiar.
– Sogndal si historie saman med dei tøffe målsetjingane klubben har for framtida trigga meg, seier den nye daglege leiaren i ei pressemelding.
– Fokuset vårt har vore å få inn ein dagleg leiar som kan vidareutvikle kjerneproduktet vårt og dei visjonane og målsetjingane klubben har. I Terje har vi funne det, seier styreleiar Tor Arne Ness i den same meldinga.