NRK Meny
Normal

Endeleg kan han springe igjen - men i verste fall går innandørssesongen fløyten

Øyvind Strømmen Kjerpeset har ikkje fått trent på den skadeutsette foten på fem veker.

Øyvind Strømmen Kjerpeset

TOK GULL: Øyvind Strømmen Kjerpeset i målomådet etter gullet på 400-meter hekk i sommar. Florø-sprinteren var ikkje nøgd med eigen prestasjon, og kutta resten av sesongen. No er også innandørssesongen i fare.

Foto: Rune Fossum / NRK

– Eg er innstilt på å måtte vente til utandørssesongen med å få konkurrert igjen, seier Øyvind Strømmen Kjerpeset.

I slutten av august avslutta 22-åringen ein skuffande 2014-sesong med å ta eit suverent NM-gull på Jessheim.

Løpet var tidsmessig så svakt at Kjerpeset bestemte seg for å kutte resten av sesongen for å bli kvitt skaden som har plaga han gjennom store delar av 2014.

Sidan då har han ikkje sprunge eitt steg på foten...

– Eg har berre hatt fri og løfta vekter - og ikkje belasta foten i det heile teke. Eg håpar eg har teke eit langt steg mot å bli heilt frisk, seier han.

Kan bli aktuelt å droppe alt inne

No er Kjerpeset igjen optimist. For frå å ha ein fot han knapt kunne trakke på, har han ikkje lenger smerter i dagleglivet. Og: Måndag skal han igjen prøve å springe på foten - for første gong på fem veker.

– Eg håpar foten bli med på laget framover. Men om eg får smerter igjen, må eg berre ta meg meir tid, seier sprinteren.

– No siktar eg alt inn mot utandørssesongen. Innandørssesongen blir berre ein eventuell bonus for meg. Eg kan ikkje prioritere innandørs før eg er heilt skadefri.

– Om du ikkje er skadefri - så kuttar du ut innandørssesongen heilt?

- Ja.

I så tilfelle vil Florø-utøvaren gå glipp av NM i Steinkjer, ein viktig landskamp og eit eventuelt innandørs-EM på 400-meter.

(Artikkelen held fram under biletet)

Kjerpeset

I AKSJON: Øyvind Strømmen Kjerpeset på veg mot mål på spesialøvinga 400-meter hekk.

Foto: Jon Eeg / NTB scanpix

Alt handlar om å få foten frisk

Kjerpeset håpar framleis han skal få med seg det som skjer innandørs i vinter. Då treng han ein god treningsperiode fram mot slutten av januar, då det er Florø Indoor i heimbyen.

– Det står igjen å sjå kor lang tid det tek før eg er heilt frisk i foten. Er eg klar tidleg i november, trur eg at eg skal løpe fort - elles blir det vanskeleg, seier han.

Kjerpeset er den største friidrettsprofilen frå Sogn og Fjordane, og blant dei mest lovande utøvarane i landet. Han står allereie med fire strake NM-gull på 400 meter hekk - og krona i fjor året med å ta kongepokalen.

I sommar vart det stang ut både under Bislett Games og EM. Men kjem han tilbake i fjorårsform, kan han ha VM i Beijing neste sommar innan rekkevidde.

– No er fokus på å få ein eitt hundre prosent frisk fot. Utan det klarer eg ikkje gjere noko som helst, seier Kjerpeset.

Statens helsetilsyn har avdekka at fire av fem norske kommunar som blei sjekka bryt lova og gir eit for dårleg tilbod til utviklingshemma.
Første i Norge som har vektløfting som valgfag.