Politikarar i norske vasskraftkommunar har etterlyst svar frå Regjeringa om kva som skjer med dei store kraftinntektene før ei eventuell kommunesamanslåing: Korleis skal desse pengane delast i nye storkommunar? Men frå Regjeringa kjem inga rettleiing:
– Dette er eit spørsmål som kommunane sit nærast til å avgjera, sa Jardar Jensen (H), statssekretær i Kommunaldepartementet, i førre veke.
- Les også:
- Les også:
– Bør behalda kraftpengane
På eit folkemøte i vasskraftkommunen Vik kom det heilt andre signal frå Regjeringa sitt støtteparti, Venstre. Rike vasskraftkommunar bør få behalda delar av inntektene sine viss dei slår seg saman med andre, meiner kommunalpolitisk talsperson på Stortinget, André Skjelstad (V).
– Delar av pengane bør gå inn i fellesskapen i den nye storkommunen. Men definitivt må delar av det som er ytt frå den kommunen – som gjennom bandlegging og neddemming av område – tilfalla den kommunen det kjem frå.
Milliardinntekter
Tal frå Energi Norge viser at om lag 100 kommunar og fylkeskommunar i landet til saman har fire milliardar kroner i kraftinntekter kvart år. Berre i Sogn og Fjordane får Aurland, Bremanger, Høyanger og Vik over 250 millionar kraftkroner i kommunekassa årleg.
Fordelinga av desse kraftpengane i nye storkommunar blir eit sentralt tema i forhandlingar før ein eventuell fusjon. Der regjeringa ikkje vil gi råd, meiner Skjelstad og Venstre at delar av kraftinntektene bør bli verande der verdiane er skapte:
– Ein bør få på plass næringsutviklingsfond, kulturfond og anna som går til det området kraftutbygginga har skjedd.
Skepsis til kommunesamanslåing
I Vik og andre kraftkommunar, som Aurland og Bremanger, er skepsisen stor til kommunesamanslåing. Det kom òg tydeleg fram på folkemøtet onsdag kveld, i regi av Vik Venstre.
For Vik finst ingen openberre samanslåingspartnarar, mellom anna fordi riksveg 13 over det vêrutsette Vikafjellet er mykje stengt om vinteren, og fordi innbyggjarane – når dei skal nordover – er avhengige av ferje, som ikkje går om natta.
Dersom kraftkommunen må slå seg saman med andre, er det naturleg å bidra til fellesskapen, meiner ordførar Marta Finden Halset (Ap). Men ho meiner at ein del av dei 45 millionar kraftkronene som Vik får kvart år, bør kommunen få behalda til næringsutvikling og samferdsleprosjekt, seier ho:
– Me må tillata oss å forventa at me får att litt, fordi det er våre naturressursar som er bygde ut, og det er her verdiane er skapte.