Onsdag morgon sette han seg på bussen for å køyre til heimbyen. I morgon skal det nemleg avgjerast om det er Sogndal eller Aalesund som møter Stabæk i siste kvalifiseringsrunde om retten til å spele i Eliteserien neste år.
Men 35-åringen med fartstid frå klubbar som Lillestrøm og Fulham let seg ikkje stresse av motstandaren denne gongen er gamle lagkameratar.
– Å spele ein så viktig kamp, uansett kven vi møter, er utruleg moro. Sjølvsagt kriblar det litt ekstra sidan eg skal til heimbyen og spele, men eg har vore med i dette gamet så lenge at eg ikkje hausar opp denne kampen for meir enn det den er. For meg spelar det ingen rolle kven som spelar på den andre banehalvdelen.
– Korleis vert det å kome heim på juleferie viss du er den som stoppar eit opprykk for Aalesund?
– Eg har masse gode vener i og rundt klubben. Eg har og familie og mange vener i byen, så det trur eg skal gå veldig fint.
– Kan verte avgjerande
Riise kan fort bli ein nøkkelspelar mot gamle lagkameratar. Det trur i alle fall fotballkommentator i Sogn Avis, Endre Romøren.
– Han har vore god no mot slutten, og han gjorde mest truleg sin beste kamp mot Aalesund tidlegare I haust. Der var han veldig god på midtbana, og betre enn spelarane på midtbana deira. Og det er ofte slik i fotball at vinn du midtbanekampen, så har du ein veldig god sjanse til å vinne sjølve kampen og, meiner Romøren.
– Statistikk betyr lite
– Sogndal har ikkje tapt borte mot Aalesund sidan 2011. Betyr det noko når dommaren bles i gang kampen?
– For meg er det berre statistikk. Kva einaste kamp lever sitt eige liv, og spesielt desse kampane som betyr så mykje. Det er veldig mykje nervar og press.
– Det mest avslappa laget vinn
– Korleis trur du kampen vert?
– Eg trur det vert ein tett og tøff batalje. Eg har sagt at det laget som klarer å senke skuldrene, vere offensive og som best klarer å takle alt rundt kampen vil kome sigrande ut.
Sjølv har Riise dette stalltipset før kampen.
– Eg likar eigentleg ikkje å tippe resultat, men eg trur det vert tett og jamt. Eg trur vi vinn 2–1.