Revisjonselskap i vanskar – vil ha fylkesfusjon

– Me ønskjer eitt nytt revisjonsselskap for heile fylket, men det vil vera krevjande å få til, fordi selskapsstrukturen då må endrast. Revisjonsselskapa i Sunnfjord og Nordfjord er i dag kommunale føretak, medan Sogn og Fjordane Revisjon i Sogn er eit interkommunalt selskap, seier styreleiar Arne Hovland i Sogn og Fjordane Revisjon.

Revisjonsselskapet på Hermansverk – som reviderer rekneskapane til fylkeskommunen og sju sognekommunar – har dei siste månadane kome i akutte vanskar:

• I mai blei det kjent at Ingvar Linde seier opp stillinga som dagleg leiar i selskapet for å bli økonomisjef i Høyanger kommune.
• I tillegg slit den vesle staben med ei langtidssjukemelding.

Nestleiar Marianne Vara har etter oppmodingar til slutt sagt ja til å gå inn som konstituert leiar, men bemanninga er så knapp at styreleiaren vurderer å trø til sjølv.

– Styreleiar må kanskje avlasta situasjonen slik at dagleg leiar slepp unna dei meir trivielle arbeidsoppgåvene, seier Hovland.

Fusjon

Ein veg ut av uføret kan vera ei samanslåing. Sogn og Fjordane Revisjon har dei siste åra gjort fusjonsframstøytar både mot dei to kommunale revisjonsselskapa i Nordfjord og Sunnfjord, og no sist mot Voss, men utan resultat.

På årsmøtet i Sogn og Fjordane kommunerevisorforeining tysdag tok Hovland og Sogn og Fjordane Revisjon eit nytt initiativ, og no kan tida vera moden, seier nyvald fylkesleiar i foreininga, Terje Førde:

– Hovland inviterte til konstruktive samtalar. Tanken er at me kan bli eit fylkesdekkjande selskap på sikt. Det stilte me oss litt positive til, og dei tre selskapa i fylket er samde om å møtast att i august for å drøfta dette vidare.

Nytt kommunekart

Nye kommune- og fylkesgrenser kan pressa fram eit slikt nytt fylkesdekkjande kommunerevisjonsselskap:

• I Sunnfjord går Jølster, Førde, Naustdal og Gaular saman til ein storkommune. I Nordfjord vurderer Hornindal å slå seg saman med Volda eller Stryn. Dette vil gripa inn i drifta til dei kommunale revisjonsselskapa i dei to futedømma.
• Skulle Sogn og Fjordane fylke gå inn i ein ny Vestlandsregion, vil det merkast godt i Sogn og Fjordane Revisjon, der fylkeskommunen krev cirka 40 prosent av arbeidsinnsatsen.

Det er politikarane i dei involverte eigarkommunane og fylkeskommunen som til sjuande å sist skal ta stilling til ein eventuell fusjon.

Klare forventningar

Fredag i førre veke hadde Sogn og Fjordane Revisjon møte med eigarane sine (sjå faktaboks), der styreleiar Hovland orienterte om den krevjande situasjonen.

På møtet presiserte fylkesordførar Jenny Følling (Sp) – som representerer den klart største eigaren, fylkeskommunen – at dei forventar at Sogn og Fjordane Revisjon leverer dei tenestene dei har avtale på.

– Det skal me klara. Blir det heilt nede på nauda, har me ein sentralorganisasjon i ryggen, og me kan dessutan få avlasting frå andre revisjonsdistrikt som har betre kapasitet, seier styreleiar Hovland.