Tidlegare enn vanleg er sauebønder no i full gang med å hente dyra heim frå fjellet.
I fjellområda mellom Årdal og Lærdal vart det i helga funne nye sauekadaver. I alt 103 sauer reknar ein med er tekne av jerv i løpet av sommaren.
- LES OGSÅ:
– Det er ein ganske formidabel skade i eit så lite område som Lærdal og Årdal, seier Rein Arne Golf hos Statens Naturoppsyn.
83 sikre funn
Av dei 103 kadavera som er funne i fjellområdet i Indre Sogn, meiner ein å kunne dokumentere at jerven står bak 83.
I Luster, der ein tidlegare har hatt store problem, kan ein førebels ikkje slå fast at jerven har teke sauer.
– Så er det nokre kadaver som er veldig oppetne, og då er det vanskeleg for oss å slå fast noko dødsårsak. Men dei er i same område som vi har god dokumentasjon for, så vi har grunn til å tru at det er jerven som er årsaka, seier Golf.
Sanka i helga
Bøndene i Naddvik beitelag har i sommar hatt kring 1.000 sauer på fjellbeite. I helga var bøndene på sauesanking.
(Artikkelen held fram under TV-saka)
Ole Bjarne Hovland var budd på å få heim lite lam. For det er hovudsakleg lam som har fått unngjelde for jerven sine herjingar.
- LES OGSÅ:
– Du får ein del økonomisk kompensasjon, men det veg ikkje heilt opp for avlsarbeidet og innsatsen du legg ned gjennom vinteren. Det er slitsamt når slike ting skjer, seier han.
Rekordstort tapstal
Hos Statens Naturoppsyn meiner Golf å kunne slå fast at jerven har teke rekordmange sauer i sommar.
– Eg trur vi kan seie det no. Tapstala ligg langt over det vi har hatt tidlegare år, seier han.
I helga kom det også inn melding om ein ubekrefta jerveskade i Stryn. Denne blir kontrollert måndag ettermiddag.
- LES OGSÅ:
– Jerven ser ikkje grensene og går i fjellet der det passer han best. Sau er veldig lett byttedyr for jerven, så det blir veldig stor skade når rovvilt og sau går rundt i same område, legg Golf til.
– Må gjere ein innsats
Det er bestemt at det ikkje skal vere faste førekomstar av gaupe, jerv, ulv og bjørn i Sogn og Fjordane. Ei av årsakene til dette er eit aktivt jordbruk og stor bruk av beiteressursane på Vestlandet.
- LES OGSÅ:
Onsdag startar lisensjakta på jerv, og Rovviltnemnda har bestemt at det kan skytast åtte jervar i regionen Sogn og Fjordane er del av. Jakttida går til 15. februar.
I Naddvik beitelag er Hovland klar på at det må gjerast ein innsats i vinter.
– Vi veit ikkje om det er ein eller fleire jervar, men det må reinskast opp. Det er beiteprioritert område, så vi må gjere ein innsats i vinter, seier han.