Rekordkrav etter avlingssvikt

Assisterande landbruksdirektør Bjørn Harald Haugsvær fortel dei har fått inn ti gonger så mange søknader om erstatning for avlingssvikt i år.

Mange av bøndene sit att med berre ein brøkdel av normal avling på grunn av ein hard vinter og kald sommar.

– Per dato har eg fått melding frå kommunane om at vi har 117 søknader. Det er ein merkbar auke i høve normalår, då vi har brukt å liggje kring ti søknader, seier han.

– Ingen har gått klar

Med totalt ti gonger så mange søknader, meiner Haugsvær at søknadsbunken nærmar seg rekordstor.

Ei tidobling i talet på erstatningssøknader fører til skyhøg utbetaling frå staten. Kring seks millionar kroner ventar Haugsvær vil bli betalt ut. Mot ein million kroner andre år.

• LES OGSÅ: Mange fruktbønder får erstatning

Spesielt ser sladdane ut til å vere verst i kommunane Flora, Fjaler, Gaular, Stryn og Luster.

– Det er nok ingen som har gått klar denne sommaren, seier Haugsvær.

(Artikkelen held fram under TV-saka)

– Frustrerande år

Skurv og sopp på epla, avlingar på halva av normalen, bøar som vart til gjørmehol og slakting av dyr på grunn av formangel, er berre nokre av følgjene den harde vinteren og kalde sommaren førte til for bøndene.

• LES OGSÅ: Tørken kan bli dyr
• LES OGSÅ: Utanlanske bærplukkarar slit

– Det er klart at det er frustrerande når ein har slikt ver som i år, og då blir det dårleg resultat, seier fruktdyrkar Terje Fosshagen, som i år hausta inn sju tonn mindre enn normalt.

(Artikkelen held fram under TV-saka)

Uroa bønder

– Slik eg har høyrt det i nabolaget her, er det ingen som har vore borti så store tap tidlegare, held Fosshagen fram. Sjølv har han tapt kring 200 000 kroner.

Bondelagsleiar Per Hilleren seier mange bønder er uroa og manglar fôr.

• LES OGSÅ: Vil frakte rundballar frå Trøndelag for å hindre nedslakting av buskap

– Det blir eit stort økonomisk tap om du har dårleg avling, må redusere tal dyr og gjerne må kjøpe fôr i tillegg. Det er klart at økonomien blir stressa av dette, seier han.