NRK Meny
Normal

Reiser frå Måløy til Oslo kvar helg for å støtte Jørn

Kvar helg reiser Jeanette og Jan Kvalheim til saman 1154 kilometer for å støtte sonen Jørn som deltek i Idol.

Jeanette og Jan Kvalheim

PENDLAR MÅLØY-OSLO-MÅLØY KVAR HELG: Det har blitt mange og lange turar på nattbussen for ekteparet Jeanette og Jan Kvalheim.

Foto: Johanne Kvalheim

– Det er galskap å reise kvar helg, men det er like mykje galskap å ikkje vere der, seier far, Jan Kvalheim.

Sonen Jørn Trollebø Kvalheim er ein av fem deltakarar som framleis heng med i talentkonkurransen Idol på TV2. På vegen dit har han først konkurrert ut nær 3500 andre håpefulle for berre i det heile tatt kome med i programmet.

Kvar fredag når Jørn entrar scenen i Idol, er foreldra på plass i salen.

– Dette er berre glede, det er berre kjekt å vere med å kunne støtte opp, seier mor Jeanette Kvalheim.

Betyr mykje

For han som står på scenen betyr det mykje å vite at foreldra er i salen.

Jørn Trollebø Kvalheim

IDOL-HÅP: Jørn Trollebø Kvalheim har gode støttespelarar i salen kvar fredag.

Foto: Silje Guddal / NRK

– Dei er heilt galne, reise så langt. Men for meg betyr det mykje. Det gir ein eigen ro å vite at dei er der, og så får eg checkpoint i salen, som eg kan sjå mot. Så eg er veldig glad for at dei er der, seier Jørn Trollebø Kvalheim.

Han er imponert over foreldra som tar turen kvar helg for å vere med.

– Det er berre kjekt og ein fin oppleving, seier mor Jeanette. Så det må vi ha med oss Dette er sjette helga på rad at vi er i Oslo.

–Det blir mykje køyring?

– Det har blitt mykje buss, det har det, ler ho.

Tøff periode

Like lystbetont har det ikkje alltid vore å pendle til Oslo for familien. For nokre år sidan fekk den eine dottera i familien kreft og måtte til behandling i Oslo

– Då hadde vi eitt år der vi pendla til Oslo når ho fekk behandling. Då var ho tre veker på sjukehuset, og ei veke heime. Og så bytte vi foreldra på å vere med ho i Oslo. Det har gått veldig fint, men det er klart det prega nok dei andre to søskena.

– Det var eit grusomt år, men samstundes så førte det familien endå tettare saman, seier Jørn.

For hans del førte det han også djupare inn i musikken.

– Det var ei tid då eg la veldig mykje av kjenslene mine i musikken, både for å hjelpe meg sjølv og søstera mi. Dette er noko eg har med meg i tankane også i dag når eg syng songar med triste tema.

Fem fredagar igjen

12 desember blir det endeleg avgjort kven som går sigrande ut av årets Idol-konkurranse.

– Eg tar ein fredag av gongen, så få vi sjå kor langt det går seier Idol-håpet frå Måløy nøkternt.

Uansett så kan han vere sikker på at kvar fredag han står på scena i Oslo, så har han to gode støttespelarar i salen.

– Ja, viss vi skulle vere så heldige så gjer vi det, seier mor Jeanette. – så lenge han er med, så må vi og vere med.

Statens helsetilsyn har avdekka at fire av fem norske kommunar som blei sjekka bryt lova og gir eit for dårleg tilbod til utviklingshemma.
Første i Norge som har vektløfting som valgfag.