Stort ras stengjer riksveg 5 mellom Skei og Sogndal

– Det er eit stort ras. Det er omlag 50 meter breitt og på det høgaste er det to meter høgt. Det er omlag hundre meter rekkverk som pressa inn i vegbana, fortel Ketil Molvær ved Vegtrafikksentralen i Lærdal.

Bilist varsla raset

Statens vegvesen fekk i 04-tida i natt melding om at eit ras stengjer riksveg 5 i Songdalsdalen ved Frudalstunnelen på Sogndalssida.

Ifølgje politiet var det ein bilist som varsla om raset.

– Ein bilist varsla om at han hadde køyrt seg inn i raset. Han måtte få hjelp til å komme seg laus og måtte vente ein time før hjelpa kom fram, fortel Olaug Holme ved operasjonsleiar ved Sogn og Fjordane politidistrikt.

Mannen skal ikkje ha fått skader i samanstøyten, og kunne køyre vekk sjølv, opplyser politiet.

Må lysne før noko blir gjort

Det er førebels uklart kva tid vegen mellom Sogndal og Skei kan opne att.

– Det er ein del arbeidet her før det blir opna att, og det må lysne før det blir gjort nye vurderingar. Eg tvilar på at det skjer noko her før i 11-12-tida, seier Molvær.

– Eg vil tru at raset er sopass stort at det må geolog inn for å vurdere rasfaren, seier Molvær.

Det er sett opp skilt både på Skei og i Sogndal som varslar bilistane om raset og om stenginga.

– Så det skal ikkje vere noko problem at folk ikkje får informasjon om steninga.