Den engelske turoperatøren spesialiserer seg på turar til dei beste køyrevegane i Europa. Ifølge nettsida, køyrer turleiar i front og leiar an.
I 17-tida tysdag byrja det å hagle inn meldingar til politiet i Sogn og Fjordane.
Sportsbilar skal ha føreteke hasardiøse forbikøyringar på rv. 5 i Sogndalsdalen i Sogn, i ein kø som oppstod grunna asfaltlegging.
Politiet varsla UP-patruljen som stod med laser på E 39 på Byrkjelo i Nordfjord. Samstundes sende dei ein patruljebil frå Førde i Sunnfjord.
Resultat: tre køyrde rett inn i laseren i 106, 107 og 111 km/t.
Verst gjekk det ut over ein engelsk sølvbestikkdesignar. I ein Aston Martin V8 Vantage vart han målt til 137 km/t av patruljen frå Førde. Bota vart 15 000 kroner og den 45 år gamle mannen har køyreforbod i Norge dei neste 22 månadane.
Turoperatør
No viser det seg at følget er på ein organisert bilreise.
Turen varar frå 3. til 11. juni og går gjennom Vestlandet. Bilane kom med ferje til Kristiansand måndag morgon.
Turen gjekk gjennom Rogaland og Hordaland til dei kom inn i Sogn og Fjordane via E16 i Gudvangen. Etter ein tur innom Lærdalstunnelen, køyrde dei fjellvegen mellom Aurland og Lærdal.
På Lærdalsøyri svinga dei nordover. Og frå femtida tysdag kom altså meldingane om rådyre sportsbilar og forbikøyringar.
19 bilar
Politiet meinte at det var ni sportsbilar i følget. NRK kan fortelje at ved avreise England skal det ha vore minst 19 bilar.
NRK har sett lista over bilane og førenamna på dei som er om bord.
Her er fleire BMW-ar, ein Lotus, fleire Porsche, mellom anna fleire Cayman, ein Aston Martin, ein Nissan GTR, fleire Mercedesar, ein Caterham, ein Mustang GT og ein Mclaren.
To turleiarar er med. Ifølge heimesida køyrer den eine fremst og viser veg, medan den andre køyrer bakarst.
Politibetjent Torbjørn Sælen var i UP-patruljen som stogga råkøyrarane.
– Eg spurde om dei brukte norske vegar som racerbane. Det nekta dei for, seier Sælen.
– Ingen fartsfest
På heimesida skriv turoperatøren at det ikkje er trong for å bryte fartsgrensa og at ingen får premie for å køyre fort eller komme først.
Men ein tidlegare gjest skriv i ei reisevurdering på Google:
– Kvar sjåfør kan køyre i sitt eige tempo. Mellom stoppepausane har dette ein tendens til å forme seg i to grupper. Den fremre gruppa blir for dei som har lyst til å trykke på, mens den bakre er for dei som ønsker eit avslappa tempo.
NRK har fleire gonger prøvd å få tak i turleiarane, utan å lukkast.