Salvesen har innsyn i saksdokumenta, og har møtt foreldra som i november i fjor vart fråtekne fem born etter mistanke om vald.
- Les også: Kritisk til splitting av søskenflokk
Borna, den yngste ein baby og den eldste 11 år, vart alle tekne ut av heimen og plasserte i tre ulike fosterheimar på Vestlandet. Foreldra er sikta for vald og saka er framleis under etterforsking.
Sit på dokumenta
Som meddommar og sakkunnig i denne type saker, har Salvesen jobba med barnevernssaker ei årrekkje.
Han er ikkje i tvil om at det var ei grov feilvurdering då barnevernet aksjonerte og tok borna ut av heimen sin.
– Det er snakk om korleis ein skal gå inn i familiar der dette er ein del av kulturen for den eine parten, seier Salvesen og legg til:
– Her var det lagt godt til rette for samarbeid frå foreldra si side. Her var det også veldig god omsorgsevne til stades som ein kunne utnytta. I tillegg var det enkelte ting familien burde fått rettleiing om.
– Rett å reagere, men ...
Han er samd i at det var rett av barnevernet å reagere når foreldra er mistenkte for oppdragarvald.
- Les også: Rumenske styresmakter ber Norge snu
– Denne type oppdraging kan vere alvorleg på mange måtar, men det er måten barnevernet reagerte på eg er kritisk til. Ein må gå inn med fagleg rådgjeving og hjelp, seier han.
– Kor uheldig er det å ta ungane vekk frå foreldra?
– Det er ein tragedie for borna. Denne saka er så sår og hjarteskjerande at det nesten ikkje er til å halde ut. Eg er ikkje i tvil om at barnevernet har gjort feil i denne saka, seier Salvesen.
Hard kritikk
Rådmann Øyvind Bang Olsen i Naustdal viser til at saka er underlagt teieplikt, men understrekar at vedtaket til kommunen er stadfesta av fylkesnemnda. Han tykkjer kritikken frå Salvesen er hard.
- Les også: Blir trakasserte etter barnevernssak
– Den er kanskje litt hard i høve til den røynda som tilsette står i når dei skal vareta borna sine behov og vern, foreldra sine ynskje om tilpassingar og vi skal forvalte det som er forvaltningspraksis på området, seier han.
– Men her har ein spesialist gått inn i saka og snakka med foreldra. Det er tale om god omsorgsevne, men behov for rettleiing på eitt par punkt. De vel å ta barna ut frå heimen. Kan det vere rett?
– Dei langsiktige tiltaka for born, som er underlagt akuttvedtak, er under behandling. I alle slike saker er det sakkunnige personar som vurderer det langsiktige behovet borna har for vern, og familien sine hjelpebehov. Det er viktig å understreke at rettstryggleiken er vareteke gjennom ordningar og lovverk som barnevernet jobbar under.