Det var i 18-tida ein laurdag i september i fjor at mannen vart vinka inn ved Sanderplass i Førde.
Bak rattet sat ein godt rusa mann i 30-åra. Blodprøve tatt kring 1 time og 48 minuttar etter køyringa, viste ein alkoholkonsentrasjon i blodet på 1,46 i promille.
Mannen, som er utanlandsk arbeidstakar i regionen, erkjende dei faktiske forholda. Under køyringa oppstod det ikkje fare- eller skadepotensielle situasjonar utover den fare slik ruspåverka køyring medfører.
I retten forklarte mannen at han treng førarkortet får å køyre mellom Norge og heimlandet der familien bur. Retten såg ikkje at tap av førarretten ville råke mannen hardare enn andre i same situasjon. Og let omsynet til trafikktryggleik og lik behandling vege tyngst.
Mannen vart frådømt førarretten i to år. Han må også 26 dagar i fengsel, samt betale ei bot på 30.000 kroner.
– Slik køyring er svært farleg, og skjer det ei ulukke så råkar den ofte vilkårleg og like gjerne uskuldige trafikantar som fotgjengarar som den som køyrer i påverka tilstand, skriv tingrettsdommar Gunnhild Grove.